Shillong, Jan 20: U Match Commissioner ka Asian Football Confederation (AFC) Mindu Dorjee hynne ka sngi Nyngkong, ula leit jurip ia ka Jawaharlal Nehru Stadium, Polo ban peit ia ki jingpynkhreh ban pynlong ia ka AFC Asian Cup 2027 Qualifier bad ia ka International Friendly ha u Bnai Lber.
Ha katei ka jingjurip la iadonlang u All India Football Federation (AIFF) Club Licensing and Competitions, Senior Manager u Abhishek Yadav, u President ka Meghalaya Football Association u Bah Hamletson Dohling bad kiwei ki dkhot jong ka MFA.
U Dorjee ula leit peit ia kane ka madan ha ka por mynsngi bad kumjuh ha ka por janmiet ha ka por ba la pynmeh ia ki bording elektrik (Floodlight) bad ula leit jurip ruh ia ka madan ialehkai ha North-Eastern Hill University (NEHU) na ka bynta ban praktis ki nongialehkai.
Ula pynpaw ia ka jingsngewtynnad ia ka jingling jingman jong ka madan ialehaki ha ka JN Stadium, ki Floodlights bad kiwei kiwei ki jingdonkam, hynrei ula pynpaw bad kdew tang ia ki mat kiba rit na ka liang ka jongu.
Ka madan praktis ki nongialehkai ka donkam ban pynbit shuh shuh bad ula ioh ia ka jingpynthikna na u Yadav bad na ka MFA bad ka kynhun kaba iatreilang lyngba ka kontrak ba kin ialeh ban pynbit pynbiang hapoh ar bnai.
U Bah Hamletson Dohling ula ai khublei ia ka sorkar jylla ia ka jingkyrshan ia ka MFA kaba la don ia ka jingthrang ban pynlong ia ki jingailehaki Football (International) bad ula ong ba kadei ka jingthrang bad ka jingieid jong u paidbah ia ka football kaba la pynshlur ia ka AIFF ban kyrshan ia ka Meghalaya ban pynlong ia kane kaj ingialehkai kaba kynsai.
Ka AFC Asian Cup 2027 Qualifier kan sdang ha ka 25 tarik u Lber hapdeng ka India bad ka Bangladesh. Katto katne sngi shwa katei ka jingiakhun, kan don ka jingiakhun paralok hapdeng ka India pyrshah ia ka Maldives, kaban ailad ia ki riewieid football ka jylla ban sngewtynnad bad sngewkmen ban sakhi ia ki ar tylli ki jingialehkai football hapoh ka nongbah Shillong.
 Mindu Dorjee hynne ka sngi Nyngkong, ula leit jurip ia ka Jawaharlal Nehru Stadium, Polo ban peit ia ki jingpynkhreh ban pynlong ia ka AFC Asian Cup 2027 Qualifier bad ia ka International Friendly ha u Bnai Lber.){kind=link}