Shong bishar ia ka pla tyngka ka MeECL
Shillong, Naitung 16: Ka Sorkar Meghalaya ka don jingthmu ban pyntyllun sted ia ka jingpyndait kor solar ha ki tnum iing (Rooftop Solar power) ha Jylla da kaba pyniasoh lang noh ia ka CM Solar Mission bad ka PM Surya Ghar Scheme ka Sorkar Pdeng, ong u Myntri Rangbah ka Jylla u Conrad K. Sangma hadien ba shong bishar ia ka kam pynmih bording na ki bor ka mariang ha ka sngi Peli.
Haba pyniaid ia ka jingialang bad ka tnad Bording, u Sangma ula khmih bniah ia ka jingpyntreikam ia ka CM Solar Mission, PM-KUSUM bad ka PM Surya Ghar, da kaba phaikhmat ha kaban pyniar ia ki lad ban ioh ia ka bording na ka sngi kaba long kaba khuid bad kaba kot bor ha kylleng jong ka jylla.
Ka jingialang kala iatai sani ia ki buit treikam ban pyniasoh ia ki Solar Programme jong ka Jylla bad ka Sorkar Pdeng ban pyniar, kyntiew ia ka jingpyntreikam bad ban pynsted ia ka jingbuh ia ki Rooftop Solar System bad kiwei kiwei ki lad pynmih bording na ka sngi.
Nalor ka Renewable Energy, ka jingialang kala khmih bniah ruh ia ka jinglong jingman jong ka pisa pilain jong ka Meghalaya Energy Corporation Limited (MeECL). Ki ophisar kila iatai sani halor ki sienjam ban pynbha ia ka jinglah ban pynneh pynsah ia ka pisa pilain ha ryngkat bad ka ai ia ka jingpynthikna ia ka jingshaniah bad ka jingbym don ka jingthud ha ka jingsam bording sha ki paitbah kiba pyndonkam.
U Sangma ula ong, ba ka thong jong ka sorkar ka long ban tei ia ka jingkhuid, ka jinglah ban kyrda bad ka jingbit jingbiang ha ka pla tyngka jong ka tnad pynmih bording kaban kyrshan ia ki iing ki sem, nongrep bad ia ka roi ka par jong ka Meghalaya ha ki snem ban wan.
Kane ka jingkhmih bniah kala wan, kadei hadien ba ka Jylla Meghalaya kala jam shaphrang ban pynbun ia ka jingpynmih bording na ka sngi, ban pynduna ia ka jingshaniah na ka jingpynmih bording kumba ju leh mynshwa bad ban pynkhlain ia ka kyrdan ha ka pisa pilain ia ka jingdon ia ka bording.
 ha Jylla da kaba pyniasoh lang noh ia ka CM Solar Mission bad ka PM Surya Ghar Scheme ka Sorkar Pdeng, ong u Myntri Rangbah ka Jylla u Conrad K. Sangma hadien ba shong bishar ia ka kam pynmih bording na ki bor ka mariang ha ka sngi Peli.){kind=link}