Shillong Naitung 16: Ka Hill Farmers Union kala sam ei ia ki jhur kubi sha ki paitbah hynne ka sngi Palei, kum ka dak ban pyrshah jur ia ka jinghiar dor kynsan jong une u jingthung.
Ha ryngkat bad ka jingthoh “Jingsam ei ia ki kubi sha ki paitbah. Ka por kan sa poi kaba ngi lah ban iehnoh ia ka kam rep namar ba kala kylla long kaba eh shibun ban rep ban riang” ong ka HFU haba pynpaw ia ka jingeh jong ki nongrep.
U President ka HFU u Bah Commander Shangpliang ula ong, ba ia u kubi mynta lah die ha ka dor T.2 shi Kg kaba long palat ia ka jinglut ha ka jingrep jingriang.
“Haba ka dor kala hiar haduh katne, ban die kam don jingmut shuh. Kane kadei ka lynti ban pyni sha ka sorkar bad sha ki paitbah kumno ki nongrep kila mad jingeh” ula ong.
Ka Union kala dawa ba ka sorkar kadei ban thaw ia ka committee ban khein ban diah ia ka jinglut jingsep ha ka rep ka riang.
U Bah Shangpliang ula ong, ba ka jinglut ha kaban pynmih ka long T.10 shi Kg, ia u kubi lah dei pat ban phah die noh ha ka dor T.11 ban ai ia ki nongrep tang T.1 ia ka jingioh nong.
Ka HFU kala dawa ban don ia ka Market Intervention Scheme na ka bynta baroh ki marrep.
Da kaba pynpaw ba ki skhim kiba mynshwa na ka bynta u synsar, ula ong, ba ka sorkar kadei ban siew ia ka bai lutksan halor ka jingiapher bak la bak ka jinglut bad ka dor die ha iew.
“Lada ka jinglut kadei T.10 bad ka dor ha iew kadei T.2, ka sorkar kadei ban siew noh T.8 ban iada na ka jingduhnong” ula bynrap.
U Bah Shangpliang ula pynpaw ba bun ki nongrep ki don hapdeng ka jingialeh ban pyndap pynbiang ia ka jinglut jingsep hala ki iing, kynthup ia ka jingsiew ia ka bai skul hapdeng ka jingmad ia ka jingeh kaba khraw.
“Ki nongrep ki don ia la ki bahaiing bahasem bad ki khun ki kti ban kyrshan. Kiba bun na ki, kila mad ia ka jingeh kaba khraw wat ban pynbiang ia ka bam ia la ka jong ka longiing” ula ong.
Ka HFU kala kyntu ia ka sorkar ba kan shimkhia noh mardor ban pynthikna ba dei ban buh ia ka dor kaba biang bad kaba ryntih na ka bynta ki nongrep.
