Shillong, Naitung 16 : Ka Sorkar Jylla kan nang pynkhlain ia ka jingpynrung kyrteng Aadhaar bad ka e-KYC ha kylleng ka Jylla ban pynthikna ba ki nongiohbynta kiba dei hok, kin ioh ia ki jingmyntoi na ki skhim bapher bapher, ong u Myntri Rangbah Conrad K Sangma ha ka sngi Palei.
Haba shong bishar kam halor ka jingiaid ki kam pynrung kyrteng Aadhaar bad jingpyniasoh bad ka Tnad Community & Rural Development, ka Tnad ka Koit ka Khiah, Social Welfare bad Food & Civil Supply, u Conrad ula ong ba ka Sorkar Jylla ka la pynleit jingmut ban pyndap ia ki jingduna ha ki jingpyniasoh Aadhaar bad jingpynshisah ia ki nongioh jingmyntoi.
Ha kane ka jingialang, la pyntip ba 77.02% ki longiing ki dei kiba la shah kynthup hapoh ka Meghalaya Health Insurance Scheme- Pradhan Mantri Jan Arogya Yojana (MHIS-PMJAY) kiba la pyniasoh bad u Aadhaar katba 57.13% ki dei ki nongioh jingmyntoi shimet kiba la dep pyniasoh.
Hapoh ka National Food Security Act (NFSA), ka Jylla kala pyndep haduh 61.01% ka e-KYC, ha kaba ka Sorkar mynta ka la pyrkhat ban pyndonkam ia ki Common Service Centre (CSC) ba kin pynsted ia ka jingpynshisha ia kiba dang sah bad ban pynrung kyrteng Aadhaar ia ki briew ki bym pat dep ha kylleng ka Jylla.
U Conrad ula ong ba ka Sorkar kala rai ban pynlong biang sa kawei ka prokram ban pynrung kyrteng Aadhaar bad ka jing pynsngewthuh paidbah ha ryngkat ka jingiatreilang bad ki bor District lem bad ki Tnad ba dei khmih ban lah pynbun ia ka jingpynrung kyrteng, khamtam ha ki jaka kiba duna ki nongpynrung kyrteng.
Haba kular ia baroh ki jingkyrshan na ka Sorkar ban iarap ia ki nongshongshnong ba kin pyndep ia ka jingpynrung kyrteng Aadhaar bad e-KYC, u Myntri Rangbah ula ban jur ba ki nongioh jingmyntoi jong ki skhim ka Sorkar Pdeng kin hap ban don ia u Aadhaar bad e-KYC khnang ba kin pynthikna ba kan ym don ka jingthut ha ka jingwan ki jingmyntoi.
Kane ka jingialang bishar kam ka dei shibynta jong ka jingpyrshang ka Jylla ban pynkhlain ia ka jingai ia ki skhim ba iadei bad ka bha ka miat khnang ba yn lah pynithuh thikna iaki nongioh bynta kiba dei hok bad pyniasoh sha ka database ka Sorkar.
