Shillong, Naitung 16 : U Myntri Rangbah ka Jylla Conrad K Sangma ha ka sngi Palei, ula pynbna ba ka Sorkar Meghalaya kan sa wanrah da ka Resolution hapoh ka Iingdorbar Thaw Ain ka Jylla, ban pyrshah ia ka jingtih Uranium hapoh ka Jylla.
Ha ka kyrwoh bala ai lyngba ka durkhih (video), u Conrad ula ong ba ka Sorkar ba ialam da ka National Peoples’ Party (NPP) ka ieng skhem ha ka nongrim ban pyrshah ia kano kano ka jingthmu ban tih ia u Uranium ha Meghalaya.
“Nga la dep kren shai la bun sien ba ka sorkar jong ngi ka pyrshah ia ka jingtih uranium bad ngin pyrshah ia kano kano ka jingpyrshang ban ioh tih ia u uranium hapoh ka Jylla” ong u Myntri Rangbah.
Ula pyntip b aula dep shong jingialang kaba bniah abd bun ki nongialam ka NPP ha ka sngi Balang. Ha ka jingiakren, ki nongialam da kawei ka sur, kila ai jingmut ba ka Sorkar Jylla bad ka Assembly ki dei ban mynjur da ka Resolution ban pyrshha ia ka jingtih uranium.
“Halor kane ka jingai jingmut bad ka rai bala shim da ki nongialam ka NPP ha ka jingialang hynnin ka sngi, ngi la jam shakhmat bad ngi la pynkhreh ban mynjur da ka Resolution ban pyrshah ia ka jingtih uranium ha Jylla” ong u Conrad.
U Myntri Rangbah ula pynpaw ia ki jingsngewkhia halor ka jingktah ia ka mariang bad ka imlang sahlang ha lyndet kane ka rai.
“Ngi iatip bha ia ki jingktah ba bun jait kiba lah ban wanhap ha ki briew jong ngi, ha ka mariang, ha ki khlaw bad ka lawei jong ka Jylla. Ki don shibun ki jingma kiba ap hangne. Kumta, ngi la ieng skhem ban gin pyrshah ia ka jingtih uranium ha ka Jylla jong ngi” ula bynrap.
Kane ka jingpynpaw u CM kala mih hapdeng ki jingkylli halor ka nongrim jong ka Sorkar Pdeng haba iadei bad ka kam tih uranium ha Jylla.
Haba kdew ia ka jingwan ba dang shen jong u Myntri Khynnah Dr Jitendra Singh sha Shillong, u Conrad ula ong ba u Myntri ula pynshai sha ki lad pathai khubor ba ka Sorkar India kam pat shim satia ia kano kano ka rai halor ka jingtih uranium ha Meghalaya bad kane ka kam ka dang don hapdeng ka jingbishar.
“Ka jingkren jong u kala shai bha ba ka Sorkar India kam pat rai eiei halor kane ka kam” ong u Conrad.
