Shillong, Nailar 15: U Myntri Rangbah ka jylla u Conrad K. Sangma hynne ka sngi u la ong, ba ki kam ki jam kiba la leh da ka sorkar MDA bad ka jylla kala ioh iaka jingiathuh bad jingiaroh ha kylleng ka ri India bad haka pyrthei baroh kawei.
“Ka Meghalaya kala jop iaka United Nations World Summit ha ka Information Society Award ha ri Switzerland halor ka Digital Innovations in Governance. Ka long ka jingsngew khyllew kaba khraw ia nga ban leit shimti ia katei ka khusnam. Ka jylla ka jong ngi, kala long ruh ka Top Performer ryngkat bad ka Gujarat bad Karnataka ha ka National Startup Rankings naka bynta u snem 2021” la ong u Conrad K Sangma haba ai jingkren haka jingrakhe iaka Independence Day ha nongbah Shillong.
U la ong, katei ka jingai jingithuh iaka Meghalaya, kaba mut na ki jylla kiba rit, ka Meghalaya kala lah ban pynbiang iaki jingdon jingem jong ka mariang ha kaban leh ia kino kino ki kam khaii pateng.
“Ngi la lah ban leh bha haka NITI Aayog’s Innovation Index. Shuh shuh ka sorkar India kala iaroh iaka rukom pyntreikam ia ki Externally Aided Project (EAP) ha ka jylla bad kala pynbiang shuh shuh iaka bhah tyngka na ka bynta ban pyniar iaka jingpyntreikam ia ka project. Mynta ngi long kum ka jylla kaba long hajrong eh ha ka jingpyntreikam iaka EAP bad ka jingioh jong ka jylla iaki project kadei katkum ka jingpynshong nongrim iaka jingtrei bha, ka jingleh bha bad ka jingpyntrei da ka buit kaba thymmai” ong u Conrad.
U la ong, mynta bun ki peit ia ka Meghalaya kum ka jylla kaba la nang kiew bha bad wat ka World Bank, Asian Development Bank bad ki kynhun kum ka IKEA Foundation bad Amazon India kila iatreilang bad bei tyngka ha ka jylla bad ki nongseng kam lajong, kumta ka Meghalaya kaba mynta kadei kaba thymmai ka kaba don iaka jingkyrmen, sngewsarong, kaba don iaka thong bad iaki kabu kiba bun.
U Myntri Rangbah u la ong, ha ki 4 snem shiteng kiba la dep kala lah ban tei iaka jingshaniah bad jingngeit ha ka sorkar.
“Ngi la trei borbah ban tei iaka jylla ha kine ki 4 snem shiteng. Nga kwah ban ai khublei kyrpang ia ki nongrep, ki samla, ki longkmie, ki khlieh nongsynshar shnong bad baroh ki nongshong shnong kiba la iahsimbynta ha kaban kyntiew iaka Meghalaya kaba thymmai” la pynkut u Conrad Sangma.
