Shillong, Lber 13: Ka Tnad Commerce & Industries hynne ka sngi Thohdieng, kala pynkup burom ia 5 ngut ki nongthain jingthain da ki kti da ka khusnam Handicraft Artisans of the Year.
Ka khusnam ka kynthup ia ka jingai ia ka buskit kaba T.50,000 bad ka syrnod.
Kiba ioh pdiang ia ka khusnam ki kynthup ia u Bah Phras Syngkli na ka shnong Umkaduh, Ri Bhoi, u Bah Gilford Pde na Chilliang Raij, Jowai, West Jaintia Hills, Mamsikha N Sangma na Balsri A’ding Chitoktak, West Garo Hills, Ensila D Shira na Rongreng Chidekgre, Williamnagar East Garo Hills bad Wanstep Thangkhiew na Umsong, Ri Bhoi.
Haba kren ha ka jingialang u Director F. Sutnga ula iaroh ia kine kiba ioh khusnam ba ka long kum ka sakhi ia ka jingtrei shitom bad ia ka jingaiti met bad mynsiem.
Namar ba ia kane ka khusnam kadei kaba la ai sha ki nongthain jingthain kti tynrai ka jylla, kan iarap ha kaban pynneh pynsah ia ki jingthain tynrai bad ia ka kolshor kaba la hiar pateng na ki longshwa manshwa bad kan iarap ruh ban pynneh pynsah ia ki.
U Director ka Commerce & Industries ula bynrap ruh ba nalor kine ki khusnam, ka tnad kan sa buddien ia kine kiba ioh khusnam da kaba ai jingkyrshan da ka pisa kaban kynthup ia ka jingai pisa ban tei ia ka Working Shed bad Store Room & Sales Outlet, ki tiar ki tar bad ia ka pisa ban pyniaid shakhmat ia ka kam bad ia ki nongioh khusnam ba kin ai jinghikai bad btin lynti ia kiba wan trei thymmai ia kane ka kam.
La khmih lynti ba shen da ka jingpyntreikam ia ka Innovation & Research Centre (I&RC) kan iarap ia ki nongthain jingthain kti ban pynmih ia ki jingthain kiba thymmai kiban iahap bha mynta bad ban kyntiew shajrong ia ka kyrdan ki mar kiba la thain da ki kti.
Ka Innovation & Research Centre (I&RC) kan don ia ki 3D Printer kiba thymmai bad Software ban pynwandur ia ki rukom thain bad ia ka dur ka dar kaba thymmai.
Ki nongioh khusnam kiba mynta bad kiba mynshwa jongka jylla ki lah ban noh synniang lem ia ka jingnang bad jingshemphang ka jongki sha kane ka center.
