Shillong, Lber 13: Ki bor District ka West Garo Hills ka la pynjlan shuh shuh ïa ka korphiw ba la pynjari ha baroh kawei ka district haba peit ïa ka jinglong jingman jong ka suk ka saiñ kaba dang ïaid mynta bad ki jingjia kiba dang jia kiba lah ban pynthut ïa ka shongsuk shongsaiñ.
Katkum ka hukum ba la pynmih da u District Magistrate, u Vibhor Aggarwal, IAS, la pynjlan ia ka korphiw katkum ka kyndon 163 jong ka Bharatiya Nagarik Suraksha Sanhita (BNSS) kum ka lad jingiada ban wanrah biang ia ka jinglong jingman ba jaijai bad ban iada na ka jingjur shuh shuh ka jingïakynad.
Kat kum ka hukum, ka korphiw kan treikam naduh ka por 6:00 A.M. jong ka 14 tarik haduh ka por 6:00 baje mynstep jong ka jong ka 15 tarik Lber 2026 tad haduh da weng noh iaka hukum.
Ha kane ka por pynjari korphiw ym shah iaki briew ban mih naki jaka sah hapoh u pud u sam jong ka West Garo Hills District.
Hynrei khnang ban pynsuk ïa ki paidbah kiba leit jingleit bad ban ailad ba kin iathied iapet ia ki mar ba donkam, ka bor District ka la pynjynsur ia ka korphiw naduh ka por 9:00 baje mynstep haduh 3:00 baje janmiet ha ka 14 tarik.
La bthah ia baroh ki bor jong ka ain, ki Executive Magistrate, bad ki ophisar pulit ha ka District ba kin pynjari tyngeh ia ka hukum bad ban leh ia kaba donkam pyrshah ia kino kino kiba lap ba ki pynkhein ia ka hukum.
Ka hukum ka kdew ba kino kino kiba pynkhein iaka hukum kin shah pynshitom katkum ka kyndon 223 jong ka Bharatiya Nyaya Sanhita bad kiwei kiwei ki kyndon ain.
