Shillong, Nailar 15 : U Myntri Rangbah ka jylla, Conrad K Sangma u la ong ba ka Meghalaya kadei ka jylla kaba dang lung bha bad kumta ki samla ba dang khie jong ka jylla ki dei ki rishot kiba khlain ia ka jylla.
“Kumba hyniew na ki shiphew ki nong Meghalaya ki dei kiba hapoh 35 snem. Ki samla ki don ruh ka jingkitkhlieh ban pynkylla dur ia ka ioh ka kot, ban pynneh pynsah ia ka mynnor bad ruh ban wanrah ia ka nam ka burom ia ka jylla. Kane ka sorkar ba mynta ka la wanrah bun ki sienjam kyrpang ha kine ki saw snem shiteng kyrpang na ka bynta ki samla,” ong u Myntri Rangbah ka Jylla haba kren kum u Kongsan ha ka jingrakhe lyngkhuh dap 75 snem ka jingioh jinglaitluid ka Ri (Independence Day ) kaba long ha madan Polo.
“Ka bynta ba hakhmat eh na ka bynta ki samla kadei ka iohkam iohjam. Kumta, ka sengkam lajong kadei ka lynti kaba ki samla ki lah ban kylla long wat ki nongai kam ai jam ruh. Ka prokram jong ka PRIME ka la dep ban pynmyntoi ia kumba 1300 ngut ki nongtreikam lajong ha kine ki lai snem ba la dep. Ngi la treilang ruh bad kine ki nongtreikam lajong wat ban pynkhreh shuh shuh ban pyniar ia ka jingtreikam (business plan), la ka long ban aplai ia ka ram, ban ioh ia ka jingithuh bad ruh bad wad ia ka iew ban pyniad iew ia ki mar jong ki,” la bynrap shuh shuh u Myntri Rangbah.
Nalorkata, u la pyntip ruh ba ka sorkar jylla ka la pyntreikam ruh da ki kor ka juk mynta na ka bynta ban pynmih ia ki lad iohkam iohkam kaba bun bha ia ki khun samla
“Ka Information Technology Park at Shillong ka la sdang ban treikam mynta u snem bad ka la dep ruh ban aikam ia ki hajar ngut ki samla ka jylla jongngi. Ka kylla kaba ar jongka Information Technology kan sdang shen mynta u snem. Ngi la pyndonkam ruh da ki kor ka juk mynta kum ki drone na ka bynta ban leit pynpoi ia ki tiar ki tar ba donkam kyrkieh. Ha ka jingwan lynshop ka jingshlei um, ngi la pyndonkam da ki drone ban leit buh dawai sha ki shnong kiba don ha South Garo Hills kaba la shah ktah jur na katei ka jinglynshop ka mariang,”bynrap biang u Myntri Rangbah.
Shuh shuh u ong ruh ba mynta ki la pyrshang kum ka pilot project na ka bynta ban synreit dawai ia ki dieng kwai ha East Khasi Hills bad ruh ha South GaroHills. “Ki don shibun ki kor ki bor ka juk mynta kiban pyntreikam na ka bynta ban ai ka lad ai kam ai jam ia ki samla ha ka por ban sa wan.”
U Myntri Rangbah u la pyntip ruh halor ka jingkordor ki prokram kiba la dep ban pyntreikam na ka bynta ka jingmyntoi jong ki samla. “Kumta ki samla ki donkam ban shaniah halade bad ban shim ia ki kabu ban pyni ia ka sap bad ka talen ba ki don. Lyngba ka ASPIRE, bun ki samla ba donsap ki la mih pyrthei bad shem ha baroh ki distrik jong ka jylla bad kine kin sa shim bynta pat ha ka State Level Talent Competition.”
“Ngi la dep ban ai jinghikai ia kumba 20,000 ngut ki samla pule ha ka ASPIRE bad ka thong jongngi ka long ban pyniar shuh shuh ia kane ka prokram sha ki 1lak ngut ki khun samla ha kine ki snem ban wan,” u la ong biang.
