Nongstoin, Naiwieng 07 : Ka Khasi Students’ Union (KSU)-Shiphew Shnong Unit, West Khasi Hills, kala leit ban ujor sha u Executive Engineer ka Tnad PWD-Mawshynrut Division ba kynnoh trei torti u contractor ia ka surok Riangkang-Nongjri-Nongmisei.
Kane ka Seng hapoh ka jingialam u President ka KSU Misei samla Sarphosly Rong bad President ka Shiphew Shnong Unit samla Aiborlin Paliar, kala leit iakynduh markhmat ia u EE ka PWD (Road)-Mawshynrut Division hynne ka sngi Palei, ban ujor ia ka jingjot rathai ka surok Riangkang-Nongjri-Nongmisei, kaba dang shu dep pynthei thymmai dang shen.
Haba kren sha ki lad pathai khubor, u samla Sarphosly ula kynnoh ba ka jingjot rathai jong kane ka surok ka dei namar ka jingtrei torti jong u contractor ia ka kam. Ula iathuh ba ka seng ha ka 4 tarik Naiwieng, ka dang wan jurip ia kane ka surok ba dang shu dep shna shen bad lap ba bun ki bynta kila jot.
U pyntip ba ka seng kala iakren ruh ia u Contractor ba un maramot noh ia kane ka surok hynrei la kynnoh ba ula sngap mynthi, kaba la pynbor ia ka seng ban leit ujor sha u Engineer.
Une u Nongialam ka KSU ula pyntip ba u Executive Engineer ula kular ba un sa bthah ia u contractor ban maramot mardor ia kane ka surok haba kular ban buddien ia ka kam khnang ba kane ka surok kan ai ia ka jingshakri kaba paka ia u paidbah.
Ka KSU kala maham ruh ia ki contractor ba kim dei shuh ban trei torti ia ka kam lem kumta ka Seng kan shim ia ka sienjam kaba kham tyngeh.
-Shiphew Shnong Unit, West Khasi Hills, kala leit ban ujor sha u Executive Engineer ka Tnad PWD-Mawshynrut Division ba kynnoh trei torti u contractor ia ka surok Riangkang-Nongjri-Nongmisei.){kind=link}