Shillong, Jylliew 12 : Ka Hynniewtrep Border Dispute Redressal Forum (HBDRF) kala ujor bad dawa ia ki bor District ka West Jaintia Hills ba kin tuklar lem halor ka jingmih ka kynhun ki Karbi ba ialam da u Augustine Hanse bad ki dkhot ka Karbi Students’ Association (KSA), kiba byrngem ban leh tyngeh ia ki shnong Pnar na Block-I lada kim sangeh noh ban pynpaw ia ka jingkwah ban wan iasoh sha ka Jylla Meghalaya.
Ha ka shithi ujor bala mudui sha u Deputy Commissioner bad Superintendent of Police ka District, u Chairman ka HBDRF Bah Chandame Sungoh ula ong “Namar kata, ngi kyrpad ia phi ba phin iakren lem ia kane ka kam bad ki bor district ka Assam khnang ba kan nym jia kano kano ka jingjia ne ka jingpyndik ia ki briew jong ngi ha Block-I”.
U iathuh ba ka jingjia ba dang shen kala jia ha ka thain Khanduli Myni ha kaba ka kynhun ki paid Karbi kila pynibor ia ki katto katne ki nongshongshnong ba dei ki Pnar ba na Block-I.
U iathuh ba arngut ki Rangbah Pnar ba na Block-I (bala buhrieh kyrteng), ki dang leit iew sha ka iew ba shisien shitaiew ha Myn-I (Am-ih) ha ka 6 tarik Jylliew 2025 hynrei kila shah khang lynti ha ka kynhun ki 4 ngut ki Karbi ba ialam da u Augustine Hanse ba na ka shnong Rongpongbong bad ki dkhot ka Karbi Students Association, Umpawiang (Langphemphi).
Kine ki arngut ki Pnar kila shah bat bad shah tohkit ha u Augustine Hanse bad kiwei namar ba ki wan ban iashimbynta ha ka rally jong ka HBDRF ba long ha Jowai, West Jaintia Hills myn ha ka 3 tarik Jymmang, 2025.
“U Augustine Hanse ula byrngem ban patan ia uwei na kine ki rangbah sha Hamren Police Station halor ka jingkynnoh ba u dei uwei na ki nongpyniaid ia kane ka jingialang ka HBDRF. U Augustine Hanse bad kiwei, kiba bthah ia kine ki rangbah ba kim dei ban leit iashimbynta ha kano kano ka jingialang ha Meghalaya. Kila hukum ruh ba ki paid Pnar ki dei ban sangeh ban pynpaw ia ka jingkwah jong ki ne pynsawa ia ka sur ba ki kwah pyniasoh sha ka Jylla Meghalaya naduh nangne shakhmat bad ha ka por ba iakren pynbeit ia u pud u sam hapdeng ki ar Jylla. Ki paid Pnar ki dei ban pynpaw ba ki kyrshang bad mynjur ban iai neh ha Karbi Anglong, Assam” ong u Bah Chandame ha ka ujor.
“U Augustine Hanse bad kiwei, kila ong ruh ia kine ki arngut ki Pnar “Me baroh ki Khasi Pnar ba sah ha Karni Anglong ka Block-I, me ia dei ban im hapoh ka jingpyniaid jong ngi bad lada mem ia mynjur, me lah ban iamih noh nangne”. U Augustine Hanse ula pynpaw ruh ia ka kyrteng jong nga (Chandame Sungoh) ha kaba kila ong “Lada ngim lah ia u ruh, ngin iawad ia ki bahaiing hasem jong u, kiba sah shane”. Kila maham ruh ia kine ki arngut ki Pnar ba kim dei ban pyntip ia kane ka kam sha ngi. Lada ki leh, kin sa iap ha ka kti jong ki” ula ong.
Ha ka kyrwoh, u Bah Chandame ula ong ba ka Forum ka kyrpad ia ka Sorkar Jylla bad ki Sengbhalang ba kin iatylli bad ban pynkut noh ia baroh ki jingtieng jingsmiej bad jingbym long shngain jong ki paid Khasi Pnar ha ki jaka khappud.
“ka Forum kan sa thoh sha ka Sorkar Meghalaya bad ki bor District ka West Jaintia Hills ba kin pynlong ia ka jingialang hapdeng ki bor District ka West Khasi Hills bad ka West Karbi Anglong nalor ki nongialam trai shnong, ki khlieh synshar shnong bad nongialam sengbhalang ban lah pynneh pynsah ia ka jingsuk bad ban ai ia ka hok bad jingbishar ba hok ia ki paid Khasi Pnar” ula bynrap.
 kala ujor bad dawa ia ki bor District ka West Jaintia Hills ba kin tuklar lem halor ka jingmih ka kynhun ki Karbi ba ialam da u Augustine Hanse bad ki dkhot ka Karbi Students’ Association (KSA), kiba byrngem ban leh tyngeh ia ki shnong Pnar na Block-I lada kim sangeh noh ban pynpaw ia ka jingkwah ban wan iasoh sha ka Jylla Meghalaya.){kind=link}