Nongstoin, Nailar 01 : Ka Federation of Khasi Jaintia & Garo People (FKJGP)- Rambrai Circle, ha ka sngi Ba-ar kala leit ban ujor sha u Engineer ka Tnad PWD halor ka jingsniew palat ka surok Nongstoin-Rambrai-Chaygaon bad ka jingkhein sting jong ka kompani ban trei pynkloi noh ia kane ka surok haduh ba bun ki kali kim lait shuh ban iaid.
Kane ka seng hapoh ka jingialam u President Jiedstarlang Lyngkhoi kala iakynduh ia u Assistant Engineer S Puwein bad aiti ruh da ka dorkhas ba un phah sha u Executive Engineer ba un tuklar lem mardor halor kane ka jinglong jingman ka surok, kaba la buh hapdeng shibun ki jingeh ia ki paidbah nongleit nongwan.
Haba iakren bad ki nongthoh khubor, u Bah Jiedstarlang ula ong ba ka jingujor ka long ba ka Tnad PWD kan bthah ia ka kompani ba pyntrei ia kane ka surok, ba kan trei pynkloi noh ia ka kam ym ban khein sting bad ban shu ieh ia ka surok ha ka jingjot rathai.
Kat kum ka jingong jong u, ki kali kiba leit sha Sohmynthar, Mawthir, Mawdumdum, Kyllang bad kiwei kiwei ki shnong, kim shym la lait shuh ban iaid na kane ka surok namar ka jingsniew palat. U ong ba wat ki Mahindra Pikup kiba dei ki fourwheel ruh kim lait shuh ban iaid.
Ula pyntip ba dang ha kine ki khyndiat sngi bala leit, iwei I Khynnah ba shitom jur bad ba donkam ban kit kyrkieh sha Rambrai PHC, ila khlad noh ha lynti tang namar ka jingbym lah ban pynpoi ia ki ha ka por kaba biang sha kane ka jaka sumar na ka daw ka surok.
