Shillong, Naitung 14: Ka seng Hynniewtrep Youth Council hynne ka sngi Thohdieng kala leit tur paidbah syndet syndet sha Secretariat bad pynlong iaka jingiakhih hakhmat ka Secretariat ban dawa pyntreikam noh iaka Inner Line Permit (ILP) bad ban pyrshah jur iaka jingthmu ban pyntrei ia ka lynti rel hapoh ka Jylla.
Ki nongialam bad dkhot ka hyc kila pyrta ia ki slogan “No ILP NO RAILWAY”, “Bangladeshi go back” nalor ka jingdawa ruh ban pynrung noh iaka ktien Khasi ha ka Eight Schedule.
Ha kane ka jingwan tur kynsan ka HYC, ki pulit kila pynjur ia ka jingpahara ha kane ka jaka. Kane ka jingiatur ka HYC kala ktah ruh ia ka leit ka wan ki kali naba ki nongiakhih kila shong ha surok hakhmat ka Secretariat.
Ia kane ka jingiakhih la weng noh tang katto katne por hadien ba u Symbud Myntri Rangbah Bah Prestone Tynsong, ula khot ia ki Nongialam ban iakren halor kane ka ishu.
Hadien ka jingialang, u General Secretary ka HYC Roykupar Synrem ula ong “Ngi la dep kren shai ba khlem ka ILP ka mut em ia ka lynti rel. Yn ym shah ia ka lynti rel ban rung ha Ri-lum Khasi bad Jaintia khlem da don ia ki ain ki ban iada ia ki trai paid riewlum na ka jingwan rung kyrthep ki bar jylla”.
“Halor kane, u (Prestone) la iai ban ba ka Sorkar kam don jingthmu ban wanrah lynti rel hapoh u pud u sam ka Ri-lum Khasi bad Jaintia ia mynta bad kam pat shym la don ruh ka jingiakren ha ka Kynhun Myntri halor kane ka kam” ula iathuh.
U pyntip ba u Symbud Myntri ula kular ba haduh mynta, kam pat don satia kano kano ka jingmut lane ka rai bala shim da ka Sorkar ban wanrah lynti rel la ka dei ha Khliehriat ne ha Byrnihat.
Halor ka jingdawa ILP, ktien Khasi bad MRSSA (Amendment) Bill, 2020, u pyntip ba u Symbud Myntri Rangbah ula iathuh ba ka Sorkar ka dang iai buddien ia kine ki kam. U iathuh ba ka Sorkar Jylla ha ka jingialam u Myntri Rangbah, kan sa ialam ia ka kynhun ba pura jong ka Kynhun Sorkar sha Delhi ban iakynduh ia u Myntri Rangbah Duh, u Myntri kam Pohiing bad kiwei ki Myntri ha kaban buddien ia kine ki kam ba sahteng.
Halor ka jingpynslem ka Sorkar Pdeng ban pyntreikam ia ka ILP ha Meghalaya watla ka Iingdorbar Thaw Ain ka Jylla kala dep mynjur da ka Resolution ha u snem 2019,une u Nongialamka HYC ula ong “U DyCM ula pyntip ha ngi ba ka jingiakren ban pyntreikam ia ka ILP ka dang sahteng, ka Home Ministry kam shym la pynpaw la hooid ne em hynrei ka dang don hapdeng ka jingiakren. Hynrei ngi la banjur b aka Sorkar ka dei ban shimkhia ia kane ka kam bad ngi la pyni ia ki jingeh ban gin sa iakynduh lada ym tehlakam ia ka jingrung kyrthep ki bar jylla”.
Ula ong ba ka HYC kala rai ban apshuwa ia ka kynhun jong ka Kynhun Myntri ba kin iakynduh ia ka Sorkar Pdeng hashuwa ban shim rai ia kaei ka lynti ban shim.
Halor ka MRSSA, u Bah Roykupar ula ong ba ka HYC kala shai kdar ha ka nongrim b aka ieng ba kam pdiang satia ia ka MRSSA 2016 namar kane ka ain kam don bniat satia ban tehlakam ia ka jing ryng kyrthep ki bar jylla hapoh ka Jylla.
“Namar kata, ngi dawa ban pyntreikam noh mardor ia ka MRSS (Amendment) Bill, 2020 kaba don ia ki kyndon jong ka ILP” ula ong haba bynrap “La kular ia ngi ba ka Sorkar Jylla kan leit sha ka MHA ha ryngkat ki artylli ki jingdawa kata ba ka Sorkar Pdeng kan ai ILP lane MRSS (Amendment) Bill, 2020 ia ka Meghalaya”.
