Aizawl, Naitung 14: Ban pynpaw ia ka jingpyrshah halor ka jingpynpra ia ki Iingmane jong ki Khristan ha ka Jylla Manipur, u Vice President ka BJP na Mizoram R Vanramchhuanga ha ka sngi Palei, ula ai ia ka shithi iehnoh kam.
Ha ka shithi bala phah sha u President ka BJP Mizoram Vanlalhmuaka, u Vanramchhuanga ula ong ba kane ka jingiehnoh kam ka dei kum ka jingpyrshah ia ki kam bymman pyrshah ia ki Khristan.
“Namar ka jingmih ka thma iapher jaidbynriew ha Manipur, haduh 357 tylli ki Iingmane ki Khristan, ki jaka sah ki Pastor bad ki Ophis jong ki Balang bapher bapher kila shah wiang ding. Hynrei, ia kine ki jingjia baroh ym shym la iohi ia ka jing kynnoh da u Myntri Rangbah ka Manipur N Biren Singh” ula ong ha ka shithi iehkam.
U Vanramchhuanga ula ong ruh “U Amit Shah, Myntri kam Pohiing ula leit iuhkjat ha Umphal hynrei une ruh u khlem kren eiei halor ka jingwiang ding ia ki Iingmane. War ka Sorkar Pdeng kam shym la pynpaw satia wat tang shi kyntien ia ka jingshah wiang ding ki Iingmane”.
Kane ka jingiehnohkam u Vice President ka BJP-Mizoram kala wan jia ruh tang da ki bnai shuwa ka elekshon Assembly ka ban long ha u Naiwieng mynta u snem.
Ki paid Khristan ki don haduh 87% ha ka jingdon paid ha Mizoram. Ha ka elekshon 2018, ka BJP kala ioh rungkhlieh da ka jingjop ia kawei ka seat.
