Agartala, Naitung 08: U Lamphang ka Iingdorbar Thaw Ain ka Manipur ha ka sngi thohdieng ula sospon ia u MLA ka Congress bad Myntri barim Sudip Roy Barman ha baroh shi lynter ka Dorbar Mang tyngka ba mynta namar ka jingkren pynjah burom pyrshah ia ki Myntri bad ka Liang Synshar.
U Sudip Roy Barman haba iashimbynta ha ka jingiatai, ula pan jingbit ia u Lamphang haba iathuh khana khlem da jer kyrteng ia kino kino ki Myntri bad MLA ula ong “U ksew u wiar kham jam ban ia u Kynad”, kaba pynbitar lep ia kiba bun ki Myntri Sorkar bad ki MLA.
Ki Mynri bad ki MLA kiba bitar ia kane ka jingkren, kila dawa ia u Lamphang ban weng noh ia ka jingkren u Barman na ka jingbuh jingthoh ka IIngdorbar bad dawa ia une u MLA ban weng noh ia kane ka jingkren pynjah burom.
U Nongialam ka Liang Pyrshah Animesh Debbarma badNongialam ka CPI(M) Jitendre Choudhury kila pyrshah jur ia ka rai jong u Lamphang.
Ha ka por mynstep jong kane ka Dorbar Mang tyngka ba dang sdang ha ka sngi thohdieng, u Lamphang ula sospon ia ki 5 ngut ki MLA kynthupu Roy Barman, na ka bynta shisngi.
Ki MLA ka Tipra Motha Party (TMP), CPI-M bad ka Congress, kila iamih jyndat ruh na ka Iingdorbar ban pynpaw ia ka jing pyrshah ia ka rai jong u Lamphang haba ki MLA ka Liang Pyrshah ki dawa ban leh eiei pyrshah ia u MLA ka BJP Jadab Lal Debnath, ia uba la shem ba u peit phlim khlem akor ha ka mobile phone jong u katba ka Dorbar jong ka IIngdorbar ka dang iaid shakhmat ha u bnai Lber.
Kine ki 5 ngut ki MLA ba shah sospon ki dei u Sudip Roy Barman (Congress), Nayan Sarrkar (CPI-M), bad Brishaketu Debbarma, Nandita Reang bad Ranjit Debbarma kiba dei jong ka TMP. U Lamphang ula bthah ruh ia u Watch & Ward Staff ban pynmih ia kine ki MLA na ka Ingdorbar.
Pule ruh: Bthah ka Manipur High Court ia ka Sorkar ban weng noh ia ka hukum khang Internet
