Agartala, Naiwieng 11 : Ka Tipra Motha Party (TMP) kaba iatreilang bad ka BJP, kala dawa ban pynbun ia ka reserve seat jong ki riewlum na ka 20 sha ka 25 ha ka Iingdorbar Thaw Ain ka Jylla ba 60 ngut ki dkhot watla ka jingdon ki riewlum ka long shibynta na ka bynta ha ka Jylla ba don 4 million ngut ki nongshongshnong.
U Khliehduh ka TMP bad Syiem barim ka Tripura Pradyot Bikram Manikya Debbarma ula ong ba 25 seat na ka 60 seat jong ka Iingdorbar Thaw Ain ka Jylla, dei ban bhah kyrpang sha ki riewlum bad kawei ka seat ia ki jaidbynriew Manipuri.
Ka Liang Pyrshah CPI-M bad ka Congress party kin dang ban pynbna ia la ka jong ka nongrim halor kane ka jingdawa jong ka TMP watla ki nongialam jong ki lai tylli ki National Party kila khein ia kane ka jingdawa kum ka bym don nongrim.
U Nongialam ba hakhlieh ka BJP ula ong ba ka BJP kan sa iakren ia kane ka jingdawa jong ka TMP hapoh ka party.
Napdeng ki 60 tylli ki seat, sa 10 tylli ki seat ki dei kiba la bhah sha ki Scheduled Caste.
U Debbarma ula pynbna ruh ba ka TMP kan sa pynlong ia ka jingialang paidbah kaba heh bha ha ka 14 tarik Naiwieng ban pan jingkyrshan ia kane ka jingdawa, kaba kynthup ruh ia ka jingpyntreikam ia ka soskular bala iasoi haba sdang jong une u Snem bad ka Sorkar Pdeng lem bad ka Sorkar Tripura.
Ka TMP, kaba synshar ia ka TTAADC naduh u Iaiong 2021, kala dawa ruh ia ka ‘Greater Tipraland’ (Jylla la ka jong na ka bynta ki riewlum) kat kum ka Article 2 bad 3 jong ka Riti Synshar ka Ri.
Ka BJP kaba synshar ia ka Jylla bad ki Liang Pyrshah- ka CPI-M bad Congress kila pyrshah jur ia kane ka jingdawa.
