Nongpoh, Naiwieng 11: Ka Nongpoh Region Auto Owner & Driver Association (NRAO&DA), hynne ka sngi Nyngkong, ka la leit ai khublei ia u Deputy Commissioner ka Ri Bhoi District hadien ka jingioh jingithuh kum ka kynhun ba pura ban shakri ia ki paidbah ha ka thaiñ Nongpoh baroh kawei.
Ki nongialam ka NRAO&DA ba la lamkhmat da u Banasar Lyngdoh Nonglait, President, Tony Shylla Vice President bad kiwei kiwei, ki la leit ban kynduh ia u DC ban pynpaw ruh ha u ba kum ka kynhun ki trai bad nongñiah auto rickshaw ka thaiñ Nongpoh, ki kloi ban iatreilang ha kino kino ki bynta jong ka jingshakri paidbah.
Haba kren bad ki Nongthoh Khubor, ki nongialam ki la pynpaw ia ka jingsngewkmen kaba khraw ban ioh ia ka jingithuh kum ka kynhun ki nongñiah auto kaba la dep ban pynthymmai shen ia baroh ki nongkitkam.
Kane ka seng ka la pynmih ruh ia ka jingmaham kaba tyngeh pyrshah ia u President barim ba um dei shuh ban kam ialade kum u nongialam ka kynhun namar ka por jong u bad ki nongkitkam barim ka la kut noh bad ula maham ruh ia u nonglum musur na ki nongñiah auto rickshaw ba un sangeh noh mardor ia kane ka jinglum pisa lem kumta ka kynhun kam banse ban shim da ki lad kiba tyngeh pyrshah ia ki.
Kane ka seng kala pynpaw ruh ba la long kaba kloi ban iatreilang bad ki Bor pyniaid Shnong ka Nongpoh bad ki tnad treikam bapher bapher jong ka sorkar jylla na bynta ka jingbit jingbiang bad ka jingmyntoi ki paidbah nongshong shnong.
Ha kane kajuh ka sngi, ki nongialam ka NRAODA ki la leit ban aiti bad wah ruh ia ki tin lum jakhlia kiba la aiti sha ka Dorbar Shnong Nongpoh ban tehlakam ia ka jingbret pathar ki paidbah ia ki jakhlia ha ki surok bah bad ha ki dukan ba don harud surok bah ban iada na ka jingbret pathar ia ki jakhlia.
