Shillong, Nailar 25: Ka Deputy Commissioner ka East Khasi Hills Kong Isawanda Laloo, hynne ka sngi palei, kala thung haduh 11 tylli ki kynhun ban pyntreikam ia ka hukum ban weng ia ki nongshong dukan madan na ki lynti iaid kiba pynkhapngiah ia ka leit ka wan jong u paidbah.
Kine ki Kynhun ki dei kiba la khlieh da u Magistrate bad ki kynthup naduh ki Pulit, ki briew na ka Tnad Urban Affairs, ka Shillong Municipal Board, PWD, PHE bad kiwei kiwei ki tnad.
Kine ki kynhun kin leit ban jurip ia baroh ki jaka ba don ki nongshong dukan madan ha kylleng ka Nongbah Shillong kynthup naduh ka Motphran, Police Bazaar, Polo, Civil Hospital, IGP Point, Barik, Laitumkhrah, Laban, Rynjah, Nongmensong bad Madanrting.
Kat kum ka hukum jong kane ka Khliehduh ka District, la ong ba ki Magistrate ba khmih ia kine ki Kynhun ki dei ban leit jurip hala ki jong ki jaka bala buh bad ban aiti ia ka kaiphod hapoh ka 30 tarik u Nailar.
La bthah ia kine ki Kynhun ba kin ithuh ia ki jaka ba khapngiah kaba dei na ka daw ka jingdon ki nong shong dukan madan bad nongdie madan.
La aibor ruh ia ki kynhun ba kin buh kyndon bad pynbeit ia ka jingsatah ki rukom shong dukan madan kat kaba lah, kum ka jingpynduna ia ki dukan, pynthikna ia ka jingiajngai hapdeng ki dukan madan bad kiwei, ha kata ka rukom ban pynthikna ba ki nongiaid nongieng kin ioh jaka ban iaid bad ba ym dei ruh ban iapein ia ka jingshngain bad ka jingkylluid ki surok ban iaid ki kali.
La bthah ruh ba ki kynhun kin lum ia ki jingtip shaphang ki nongshong dukan madan ha kane ka jingleit jurip bad bthah ia u CEO ka SMB bad District Urban Planner ba kin iarap lang ha kane ka kam.
Nalor kane, la aibor ruh ba kin ithuh ia kiwei ki jaka lada jia ba kim lah ban pynbeit ia ka jingsatah bad ban pynkynriah ia ki nongshongdukan madan.
Ka Deputy Commissioner kala bthah ruh ba ki Kynhun ki dei ban iatreilang bad kiwei pat ki kynhun ba iadon bynta ha ka kam kum u Syiem ka Hima Mylliem, ki Rangbah Shnong haba donkam. La bthah ruh ban batai ia ki Nongmihkhmat jong ki seng Nongshong dukan madan ba kin tip.
