Shillong Nailar 25: U Lieutenant General Gurbirpal Singh,Director General ka National Cadest Corp (NCC) u la pynpaw ba ka rukom treikam jong ka Directorate ka NCC-NER kaba don ha Shillong ka long kaba biang bha haba pyntip ba dang shen la kyntiew kyrdan ruh ia ki 2 tylli ki kynhun jong ka NCC sha ka Batallion.
“Nga dang shu dep wan iakynduh ia u Myntri ka pule puthi ka jylla bad ka jinglong jingman jongka NCC ha Meghalaya ka long kaba biang bha namar na kylleng ki bynta jong ka jylla Meghalaya, kila mih shakhmat ban long ki dkhot jongka NCC bad dang shen Ar tylli ki kynhun jongka NCC kila shah kyntiew kyrdan sha ka Batallion bad ka rukom long bad ka rukom ai jinghikai ka long kaba paka bha” ong u Gurbirpal Singh hadien ka jingai khusnam ia ki 21 ngut ki dkhot ka NCC jong ka thain shatei lama mihngi haka jingialang kaba la long ha nongbah Shillong.
U la ong, ki don 1 lak tam ki dkhot ka NCC haka thain Shatei Lam Mihngi bad u dap da ka jingkmen ban iohi ba bun ki samla na kylleng ka bynta jong ka thain kila pyniasoh bad iadonbynta bad ka NCC.
“Hadien ba ka jingsaphriang ka khlam jingpang kala kut noh, ka NCC kala lah ban pyniaid shakhmat ia kiba bun ki kam ki jam bad nga dap da ka jingsngewtynnad ban iohi iaka rukom treikam khamtam ha kaban ai jinghikai la ka dei haka siat, ki kam ialehkai, ka riti ka dustur bad kiwei kiwei kiba ka Directorate jongka NCC-NER kala lah ruh ban treikam bha, khamtam ha kaban ai iaka jinghikai kaba paka ia ki Cadet” ong u Gurbirpal Singh.
U la ong, ka thong jong ka NCC ka long ban ai jinghikai iaki samla bad ha kajuh ka por ban pynshlur iaki ban rung ha ki kam shipai bapher bapher ban iada iaka ri.
“Ka NCC kala sdang ruh iaka prokram Puneet Sagar Abhiyan ha kaban pynkhuid ia ki wahduid bad ki wah kiba dap da ki plastik ha ryngkat bad ka pynsaphriang iaka khubor sha kiwei pat iaka jingma naka jingpyndonkam ia ki plastic” ula ong.
“Kala don ruh ka Seema Darshak ha kaba la ialam ia ki NCC sha ki khappud kiba don marjan bad kiwei pat ki ri, ban iakren bad iakynduh ia ki shipai kiba ieng ban iada iaka ri ha khappud” ula bynrap.
U la iathuh, ba kala don ruh ka High Power Commitee kaba peit kumno ban pyniar bad pynkhlain shuh shuh iaka NCC haka thain shatei lam mihngi bad haka ri hi baroh kawei.
U Gurbirpal u la ong, kawei na ki thong jongka NCC kadei ban pynlong iaki Cadet kum ki nongshong shnong kiba don iaka jingkitkhlieh bad na ka liang jongka National Disaster Management Agency (NDMA) ka ju ai jinghikai ia ia ki NCC ia kaei kaba dei ban leh haka por ba wan lynshop ka bor mariang bad ki NCC kidei kiba la ioh iaka jinghikai bad ki lah ruh ban iadonbynta lang ha kaban ai jingkyrshan haba don ka jingwan lynshop jongka bor mariang.
