Shillong, Nailur 11: U Chairman ka BJP’s Central Scheme Monitoring Committee (CSMC) Bah A.L.Hek hynne ka sngi U Blei ula thoh sha u Myntri Rangbah duh ka Ri Narendra Modi ba kyrpad ban tuklar lem ha kaban thung ia ka jingtohkit halor ka jingkynnoh leh bym hok ka Sorkar Jylla ha ka jingai contract ban tei ia ka Iingdorbar Thaw Ain ba thymmai ka Jylla.
U Bah Hek ha ka shithi sha u Myntri Rangbah Duh ula kynnoh ia ka jingiatreikam bym hok hapdeng ka Uttar Pradesh Nirman Nigam Limited bad ka Badri Rai Company Limited, kaba la wanrah ia ka jinglehrain kaba khraw ia ka Jylla.
“Kala wanrah ym tang ka jinglehrain hakhmat ka pyrthei hynrei kala pynduhnong ruh jhor bha ia ka pla tyngka ka Jylla. Namar kata, nga kyrpad ia phi ban leh eiei kyrkieh da kaba thung ia ka High Level Inquiry ban kyndang naduh thymmei ia ka jingiatreikam bymhok kine ki ar Company” ula ong.
Une u MLA ka Pynthorumkhrah ula ong ba ka jingshem jong ka Indian Institute of Technology, Guwahati kala kren shai ba u dome bala tei ha ka Iingdorbar Thaw ain ba thymmai ha Mawdiangdiang, New Shillong Township uba la khyllem ha ka 22 tarik Jymmang, 2022 ka dei tang namar ka jingkhia palat pud bad ka jingbym don ka jingiatreilang hapdeng ka nongpynwandur ia u dome bad ki contractor ba pyntrei ia ka project.
Haba pynpaw ba ka jingkhyllem u dome kala wanrah ia ka jinglehrain bad jingjah burom ia ka Jylla, ula pyntip ruh ia u Myntri Rangbah Duh ha ka shithi halor ka jingartatien ha ka rukom jied ia ka contractor ban tei ia ka Iingdorbar Thaw Ain ka Jylla.
U Bah Hek u iathuh ba ha ka jingiathep tender, ka kompani Badri Rai ba na Assam, kala shah pynduh hadien ba bishar ia ki kot ki sla jong ka technical naba kane ka kompani kam pat ju tei ia u dome bad kam shym la lah ruh ban pynbiang ia ka Bank Solvency Certificate/ Overdraft Facilities/Credit Limit na ki Nationalised Bank la kumno kumno ruh kumba 20% na ka jingmang ban tei ia ka project bala buh ha ka tender.
Namar kane, ia ka kam la aiti sha ka Uttar Pradesh Rajkiya Nirman Nigam Limited, uba la ai subcontract pynban sha ka Badri Rai Company Ltd, kaba la shah kyntait ha ka por ba bishar ia ki kot ki sla halor kiba bun ki nongrim, ula ong.
