Shillong Nailur 11: Ka Department of Psychology, jong ka Martin Luther Christian University, haka 10 tarik Nailur kala pynlong iaka jingialap ha Motphran, ban pyn sngewthuh ia ki paidbah ba kin kiar bad weng na ka jingmut jingpyrkhat ia ka jingthmu ban dkhat jubor iala ka jong ka jingim.
La pynlong ia kane ka jingialap ban pynsngewthuh bad ban ai jingbatai ia ki paidbah ba kidei ban kiar ha kaban dkhat jubor iala ka jingim kaba kordor hynrei ban kyntiew iaka jingiatrei lang jong baroh bad ban pynkhlain bor ialade ban kiar naka jingpynmaw kiba lah ban pynkhuslai ia ka jingim.
Da kaba phaikhmat iaka matpdeng “Creating Hope through Action” jong ka World Suicide Prevention Day mynta u snem, ka Kong Iwapaka Shullai, kala ong, ka imlang sahlang ka don iaka jingkitkhlieh bad iaka bor ban wanrah iaka jingkyrmen da kaba leh ia ki kam.
Ban pynsngewthuh halor katei ka matpdeng, ki samla pule ka MLCU kila leh iaka drama ha kaba la pynleit jingmut kumno ban lap bad ban ithuh ia ki jingma iaka jingthmu ban shim iala ka jongka jingim bad kumno ban iarap bad btin lynti na ka bynta ban ioh iaka jingiarap kaba paka.
Ha kane kajuh ka sngi, la pynlong ruh iaka jingthang mombati ne Candlelight Vigil ha Khyndailad, kum ka dak ban kynmaw ia kito kiba la dkhat jubor iala ka jingim bad kito kiba la shah ktah na ka jingdkhat jubor iala ka jingim.
Ki nonghikai bad ki samla pule kila iashimbynta ruh ha ka jingbuh jingduwai na ka bynta kito kiba la shim jubor iala ka jingim bad naka bynta kito kiba la shah ktah jur.
