Shillong, Nailar 13 : Ka Sorkar Jylla ka dang bishar ia ka jingthmu ban pyntreikam noh da ka skhim medical reimburse-ment (ban siew hadien ia ka bailut baisep haba leit sumar jingpang) ba syriem kum ka Meghalaya Health Insurance Scheme (MHIS) na ka bynta ki nongtrei Sorkar.
“Ngi la iakren ba ngin wanrah noh da ka skhim ba syriem kum ka MHIS (ban siew hadien ia ka bailut baisep haba leit sumar jingpang) wat ia ki nongtrei Sorkar” ong u Principal Secretary ka Tnad ka Koit ka Khiah Sampath Kumar haba iakren bad ki nongthoh khubor hadien ba wai ka jingialang jong ka Tnad ha ka sngi Ba-ar.
Haba pynpaw ba ka dei ka rai halor ka policy bad ka Sorkar ka dang pyrkhat ia kane, u Sampath ula ong ba ka jingtyrwa ka dang don ha ka jingiakren, bad ka Sorkar ka dang pan ia ki jingai jingmut na ki Medical Superintendent bad ki District Medical & Heath Officer (DMHO) na kylleng ki District ka Jylla.
U Kumar ula ong ba ki jingiakren halor kane ka phang kala iaid shaid shaid ban lap ia ki jingeh kiba lah ban mih bad ban wanrah pat ia ki lynti ban weng ia ki.
Kat kum ka jingong jong u, ka MHIS ka dei ka skhim kaba biang palat, kaba ai jingmyntoi khlem da pyndonkam ia ka pisa sha ki nongioh jingmyntoi. Hynrei, ia ki nongtrei Sorkar, kane ka rukom siew pat hadien ia ka jinglut jingsep ba iaid mynta ka donkam ia ki ban hap siew shuwa nalade shuwa ba kin ioh pat ia ka pisa na ka Sorkar.
 ba syriem kum ka Meghalaya Health Insurance Scheme (MHIS) na ka bynta ki nongtrei Sorkar.){kind=link}