Shillong, Nailar 19 : Ka Myntri ka Koit ka Khiah Kong Ampareen Lyngdoh kala pyntip ba la jingtyrwa ban pynkiew ia ka pisa jong ka bond ia ki samla ba leit pule MBBS kala don hapdeng ka jingbishar jong ka Sorkar Jylla.
“La ngin kyntiew ne em ia ka bond ka dei ka kam kaba ngi dang shong bishar mynta” ong ka kong Ampareen haba iakren bad ki nongthoh khubor ha ka sngi Ba-ar.
Kane ka jingkynthoh kala mih hadien ka jingdawa ba dang shen jong ka Hynniewtrep Youth Council (HYC) ban leh tyngeh pyrshah ia ki samla pule MBBS ba bei tyngka ka Sorkar, ki bym shym la wanphai ban ai ka jingshari ia ka Sorkar hadien ba ki pyndep ia ka jingpule.
Ka Myntri kala pynpaw ia ka jingkyrmen ba ka Sorkar kan lah ban shong bishar bha ia kane ka kam bad ban shim ia ka rai ka ban ai jingmyntoi ia ka Jylla bad ia ki nongshongshnong.
Ka HYC kala ai jingmut ban pynkiew ruh ia ka bond sha ka T. 1 klur ka ban sdang treikam naduh ka samoi pule u snem 2026-27.
Ka HYC kala sot na ka jingshem RTI kaba pynpaw ba hapdeng u snem 2015-16 bad 2019-2020, ka Sorkar Jylla kala bei pisa ia 359 ngut ki samla pule ba kin leit pule MBBS hynrei haduh 96 ngut ki samla pule kim shym la wan phai ban ai ka jingshakri ia ka Sorkar bad ban pyndep ia ki kyndon bala iateh hapoh ka bond.
Ka Kong Ampareen kala ban jur ba ka jingiatai halor ka bond bad ka jingpynbor ia ki doktor ban soi iaka bond kat kum ka ain kam dei satia kaba dang thymmai bad kala iaid la bun bun snem.
Ka Myntri kala pynpaw ba ka Sorkar kala mad ia ki jingeh haba iadei bad ki doktor ki bym wan phai pat sha ka Jylla hadien ba ki pyndep ia ka jingpule jong ki.
Hynrei, da ka jingpynkha ia ka Meghalaya Medical Registration Council, ka jinglong jingman kala kham bha, bad ki samla pule ki donkam myntaban register bad ka State Board hadien ba ki pyndep ia ka jingpule MBBS.
“Kumta ki kam kila kham biang. Ngi sngewnguh ia u Myntri Rangbah bad ka Kynhun Myntri namar ka jingmynjur bad ai jingbit ban thaw ia kane ka Board” kala ong.
Ka Myntri kala pynpaw ruh ba ka pisa jong ka bond ka dei kaba la pynkiew ha ki snem bala leit. “Hooid, ha kawei ka por ki samla pule ki hap ban ai T. 34-35 (lak) bad la pynkiew sha ka T. 40-45 lak bad u nombor ula nang kiew hynrei ngi la iohi ba ki samla pule kim ipatiaw satia da kaba iasoi ia ka bond. Kam dei satia ka kam ban sngew kit ram da ka pisa ka ban btin lynti ia ki samla pule ka Meghalaya” ula ong.
Hynrei kala ban jur ba ka jingpynleit jingmut ka dei ban long ka jingpynshlur ia ki samla pule ba kin wanphai shala iing bad shakri iala ki jong ki briew ha ka jaka ba kin sngew kit ram na ka pisa.
Ka Myntri kala pynpaw ia ka jingkyrmen ba ka Sorkar kan lah ban shong bishar bha ia kane ka kam bad ban shim rai ka ban ai jingmyntoi ia ka Jylla bad ia ki nongshongshnong.
