Shillong, Nailar 19: U Myntri Rangbah ka Jylla Meghalaya Conrad K Sangma ha ka sngi Ba-aru la plie ia ka Computer Lab kaba dang shu tei thymmai jong ka Mawlai Presbyterian College ia kaba la bei pisa lyngba ka Chief Minister’s Development Fund (CMDF).
Iaka Computer Lab la shna haka jinglut kaba kot T.10 lak, ka ban kyntiew ïa ka jingpule digital bad ailad ïa ki samla pule ban ïoh ïa ki lad jingïarap katkum ka juk mynta.
Haba kren ha kane ka sngi u Myntri Rangbah ka Jylla u la kdew ba ia ka jingdonkam ia ki kor Computer la pynsngew ha u naduh ki por ba u wan jurip nyngkong iaka College bad mynta u pynpaw ia ka jingsngewkmen, namar ka Computer Lab kala urlong.
U Conrad u la ban jur ïa ka jingdonkam jong ka pule puthi kum ka bynta ba kongsan tam na ka bynta ka Sorkar bad ula kubur ruh ba ki don ki jingeh kiba dang ïai bteng ban don hapoh ka tnat pule puthi jong ka Jylla.
Wat hapdeng ki jingeh, u Myntri Rangbah u la pynpaw biang ïa ka jingangnud jong ka Sorkar ban pynkhlain ïa ki jaka pule bad ban pynbha ïa ka jingïoh ïa ka jingpule kaba bha na ka bynta baroh ki samla pule.
Nalor kane u Myntri Rangbah ula pynthikna ban bteng ïa ka jingkyrshan ïa ka Mawlai Presbyterian College da kaba pynbna ïa ka song pisa ba T.10 lak na ka bynta ka jingtei ïa ka Building thymmai jong ka College.
U la ai ruh ïa ka jingïarap kaba T.3 lak ban kyrshan ban thied ïa ki tiar tem, da kaba pynshlur ïa ki samla pule ban shim ruh ïa ki kam ba shabar jong ka jingpule.
U la ai khublei ia ka College na ka bynta ka jingaiti jong ka ban shakri ia ki samla bad u la ban jur ia ka bynta jong ka balang, ka imlang sahlang, bad ka Dorkar ha kaba kyrshan lang ia ki jaka pule.
Ha kane ka prokram la don lang ki dkhot jong ka governing body jong ka College, principal, ki nonghikai, ki rangbah balang, bad ki samla pule jong ka kolej.
.){kind=link}