Shillong, Risaw 12: Ka Jylla Meghalaya kala pyndep 95.35% ia ka jingkhot bishar ne Hearing kaba iadei bad ka Special Intensive Revision (SIR) ia ka Electoral Roll bad la khmih lynti ba ia ka thup kyrteng ba pura ne Final Voter List yn pynmih ha ka 26 tarik u Risaw , la ong ka ophis jong u Chief Electoral Officer, hynne ka sngi Nyngkong.
Na ki 6,51,735 tylli ki notis kiba la phah ha ka jingleh ia ka jingpynbeit, lah dep pynlong ia 6,21,399 tylli ki jingbishar bniah bad kane ka long katkum ki jingtip kiba haduh mynta kiba la khmih da u Chief Electoral Officer u B.D.R. Tiwari lyngba ka Video Conferencing bad ki heh ophisar na ki district ki bapher bapher.
Kine ki notis ki kynthup ia ki 2,22,786 tylli ki jingjia kiba kynthup ia kia jingbym paw ha ka jingithuh ne Mapping bad 4,28,949 tylli kidei kiba don jingduna ha kaba iadei bad ka Mapping.
Haduh mynta, kila don 2,641 ngut ki nongthep vote kidei kiba la shem ba ym lah ban kynthup ia ki ha ka final electoral roll, katba 20,86,026 ngut ki nongthep vote kidei kiba laithuh ban pynmih ia ka kyrteng ka jongki ha ka final electoral roll, la ong ka Tnad Election.
U Tiwari ula bthah ia baroh ki ophisar ban pynkloi ia ka jingkhmih bniah ia ki katto katne ki jingjia bad ka pynthikna ba dei ban bud ryntih ia ki kyndon bad ia ki kyndon jingbthah jongka Election Commission of India.
U CEO ula pynlong ruh ia kawei pat ka jingialang bad ki nongmihkhmat na ki seng sain pyrthei ban khmih bniah ia ka jinglong jingman jong ka jingpynbeit ryntih ia ka thup kyrteng ki nongthep vote, ka jinglong jingman kaba iadei bad ki notis kiba la phah bad ki jingbishar bniah, ka jingioh pdiang ia ki aplikeshon bad ka jingpynkhreh ban pynmih ia ka thup kyrteng ba pura jong ki nongthep vote ka jylla.
La ioh pdiang palat 28,000 tylli ki eplikeshon.
Ka Tnad Election kala ioh pdiang bad lah pynrung da ka Digital ia 28,627 tylli ki aplikeshon ha ka jingkhmih bniah biang.
Kine ki kynthup ia ki 17,248 tylli ki aplikeshon ban pynrung kyrteng, 1,963 kiba kyrpad ban pyndam ne kiba la mih ki jingpyrshah, 1,673 tylli kiba la kynriah noh ia ki jaka sah bad 7,743 kiba la kyrpad ban pynbeit ia ki jingduna ha ka jingpynrung kyrteng ha ka electoral roll.
Ki Electoral Registration Officers bad Assistant Electoral Registration Officers, kila shah bthah ban khmih bniah bad ban pyndep noh ia ka jingshim rai halor ki aplikeshon da kaba iaid katkum ki kyndon kiba lah buh.
Ia ka Final Electoral Roll la buh Tarik ban pynmih ha ka 26 tarik u Risaw katkum ka jingpynbna thymmai kaba la mynjur da ka Election Commission of India.
La pynlong ruh ia ka jingpynrung kyrteng kyrpang na ka bynta kito kiba la shah ieh ha ka jingpynrung kyrteng, ki nongthep vote ha ka sien kaba nyngkong bad kiba dang samla kadei kaba la tyrwa hadien ba lah dep pynmih ia ka thup kyrteng kaba pura.
Ka Tnad Election kala kyntu ia ki nongthep vote ba kin pynthikna ia ki kyrteng ki jongki hadien ka 26 tarik u Risaw lyngba ki Booth Level Officer ne lyngba ka Election Commission’s Voters’ Service Portal da kaba leit ha https://voters.eci.gov.in.
Kala pynkynmaw ruh ia ki nongthep vote ba ka jingdon ia ka Elector Photo Identity Card (EPIC) kam mut satia ba kidei ki briew kiba lah thikna ban ioh thep vote. Ia ka kyrteng ki nongthep vote dei ban kynthup lang ha ka Electoral Roll kaba la pyntreikam ha ki constituency.
