Khliehriat, Risaw 12 : Ki Pulit ka East Jaintia Hills District, kila ioh bat ia kawei ka ambulance ba suba kit ia u droks heroin ba shongdor haduh T.1.5 klur ha ka jingtalasi kali ha Damcherra, Kuliang ha ka sngi Nyngkong.
Ha kane ka jingjia, ki Pulit kila ioh ruh ban kem ia 4 ngut ki briew kiba don ha kane ka ambulance, kiba adei na Assam.
U Superintendent of Police ka District Shailendra Bamaniya, u pyntip ba ki Pulit kila pynieng ia ka khyrdop talasi kali ha Damcherra haba ioh jingtip ia ka jingdon ki nongkhaii droks kiba wan kiew na Assam. U iathuh ba ha ka por 1 baje mynstep, ki Pulit kila ioh bat ia ka Maruti Eeco ambulance kaba don u nombor ML13-B-1459 kaba wan na Silchar bad ba thmu ban hiar sha Guwahati.
U iathuh ba ha ka jingtalasi, ki Pulit kila lap ia 27 tylli ki synduk sabon kiba don ia u drok heroin uba khia kumba 409.89 gram.
Ki 4 ngut ki briew kiba don hapoh ka kali ki kyrteng u Alom Hussain Laskar, Nazim Uddin Burbhuiya, Mahir Hussain Mazumdar bad Hashina Mamata Choudhury, kiba dei ki nongshongshnong ka Silchar, ong une u Heh Pulit.
Ia kine ki briew la register case ha Lumshnong Police Station hapoh ki kyndon ka Narcotic Drugs and Psychotropic Substances (NDPS) Act.
Ka jingtohkit ia kine ki 4 ngut kala iaid shakhmat.
