Shillong, Nailar 19 : Ka Sorkar Jylla ha ka sngi Ba-ar, kala iasoi ia ka Memorandum of Understanding (MoU) bad ka Abhinav Bindra Foundation ban pyntreikam ia ka Olympic Values Education Programme (OVEP) ha kylleng ki skul ha ka Jylla.
Ia ka MoU la iasoi hapdeng ka tnad Pule Puthi, ka Tnad Sport & Youth Affairs ka Sorkar Jylla bad ka Foundation ha ka jingialang kaba long ha Cabinet Room, Main Secretariat, Shillong ha ka jingiadonlang u Myntri Rangbah ka Jylla Conrad K Sangma bad u Abhinav Bindra u Olympic Gold Medallist bad nongseng ka Abhinav Bindra Foundation.
Haba kren ha ka jingialang, u Myntri Rangbah ula ong ba kane ka prokram ka iahap bha bad ka Youth Policy jong ka Sorkar Jylla.
“Ka jingialehkai kam dei tang ka kam khih met — ka dei kaei kaei kaba pynwan dur ia ngi, kaba pynrung ia ka jinglong ryntih, ka jingtrei shitom bad ka jingkitkhlieh bad kaba tei ia ki jinglong kiba neh ha ka jingim jong ngi. Ka Olympic Values Education Programme ka iahap bha bad ka thong jong ngi ban kynshew ha ki samla bad pynthikna ba kin heh kin san ban long ki nongshongshnong kiba don jingkitkhlieh bad kiba tei. Da ka jingialam lynti u Abhinav Bindra ia kane ka sienjam, ki samla pule jong ngi kin ioh mynsiem ban pdiang ia ka jinglong ba bha, ka jingialong paralok bad ka jingburom” ong u Conrad.
U Conrad ula kular ruh ia ka jingkyrshan ba pura jong ka Sorkar ban pynlong ia ka OVEP kaba jop.
“Ngin trei shitom ban pynthikna ba ka Meghalaya kan long ka nuksa ba tyngshain ha ka jingpyntreikam ia kane ka prokram. Da palat 50% na ki nongshongshong jong ki ba hapoh 20 snem, ka jingkynshew ha ki samla ka long kaba kongsan bad kane ka prokram kan ieng kum ka jingkynshew kaba neh slem ha ka lawei ka jong ki” ong u Myntri Rangbah.
U Abhinav Bindra ula ban jur ia ka bor pynkylla dur jong ka jinghikai kaba pynshong nongrim ha ki jinglong ba kordor.
Kiba la iadonlang ha kane ka sngi ki kynthup ia u Dr. Vijay Kumar D. Commissioner & Secretary, Sports & Youth Affairs; D.D. Shira, Director, Sports & Youth Affairs; Banteilang Kharsandi, Director, School Education & Literacy; ki nongkitkam ka Meghalaya Olympic Association bad kiwei kiwei.
 bad ka Abhinav Bindra Foundation ban pyntreikam ia ka Olympic Values Education Programme (OVEP) ha kylleng ki skul ha ka Jylla.){kind=link}