Shillong, Nailur 12 : Ka Jyotish Peethadheeshwar Shankaracharya Avimukteshwarandah kan pynlong ia ka Gau Dhwaj ban pynbna ia ka masi kum ka kmie jong ka Ri ha ka 2 tarik Risaw ha Shillong.
Kane ka seng ki Hindu kam shym la lah ban pynbna ia kane lyngba ki lad pathai khubor hadien ka jingleit pyrshah jur jong ka seng Hynniewtrep Youth Council (HYC) hakhmat ka phyllaw jong ka Shillong Press Club hynne ka step sngi Palei. Ka tnad pulit kala pynkhlain bha ia ki bor pahara ha sawdong ka SPC ha kane ka jingwan pyrshah ka HYC.
Hynrei u Yogiraj Shailendra ha ka kyrwoh ula ong “Ngi la la pan la bun sien da ka jingthoh ban pynlong ia ka jingiakynduh bad ki lad pathai khubor na ka Press Club of Shillong hynrei ngi khlem ioh pdiang satia. Kumta, ngim shym la lah shuh ban iakynduh ia ki lad pathai khubor”.
Ka kyrwoh ka pyntip ruh ba u “Shankaracharya un sa wan poi ha Shillong, Meghalaya ha ka janmiet jong ka 1 tarik Risaw. Ha ka 2 tarik Risaw, un sa pyniaid ia ka jingialang ban pynieng ia ka Gau Dhwaj bad ai jingkren ha ka Gau Mahasabha. Hadien kane, un sa mih ban leit sa sha West Bengal”.
“Ka jingthmu jong ka Gau Dhwaj Sthapana Bharat Yatra ka long ban kyrsiew thiah ia ki briew ba mane ia ka Masi, pynitylli ia ki na kawei kawei ka daw bah-pynneh ia ka burom bad ka iktiar jong ka masi, bad ban pynkup burom ia a masi da ka kyrdan ‘Rashtra Mata”, kala ong.
Kala pyntip ruh ba ka Gau Dhwaj Sthapana Bharat Yatra kan sdang naduh ka 22 tarik u Nailur.
