Shillong, Naitung 07: U Chief Executive Member (CEM) ka Khasi Hills Autonomous District Council (KHADC) Bah Titosstarwell Chyne, hynne ka sngi ula pyntip ia ka Iingdorbar ba ka Council kala pynkhreh mynta ban ithuh noh ia ki katto katne ki jaka harud ka surok Shillong-Guwahati ban pynlong kum ka iew ban die ia ki mrad bam doh.
Haba jubab ia ka motion bala wanrah da u MDC ka Mawhati Constituency Bah Charles Marngap halor ka jingeh jong ki paid Nongrep kiba hapoh u pud ka Council, u Bah Titos ula ong b aka Executive Committee ka sngew ruh ia ka jingdonkam ban buh ia kum kane ka iew kaban the kyndon ia ka jingwan pynpoi ia ki mrad bam doh na shabar ka Jylla Meghalaya.
“Ka District Council ka dang pynkhreh mynta ban ithuh ia ka jaka ban buh ia kane ka Iew die mrad bam doh bad kine ki Iew kin don ia ki doktor na ka Tnad Veterinary ki ban peit ia kine ki mrad bam doh kiba wan na shabar ka Jylla” ong u Bah Titos.
U Bah Titos hashuwa kane, ula pyntip ba ka District Council kala wanrah ia ka Livestock Regulation Bill 2021 bad ia kane ka Bill la phah sha u Lat ka Jylla ban ioh ia ka jingmynjur.
U CEM u pyntip ba u Lat ka Jylla ula pynphai nbiang ia kane ka Bill sha ka District Council ha ryngkat ka jingai jingmut bad kane ka Bill ka don mynta bad ka Tnad Veterinary ka Sorkar Jylla.
Shuwa kane, u Bah Charles Marngar ula ai jingmut ia ka Iing ba ka jingdon jong kine ki Iew kan ym iarap tang ia ka District Council ban ioh khajna hynrei kan iarap ban khanglad ia ka jingwan pynpoi ia ki jingri jingdup ba wanrah na ki jaka nongwei sha ki Iew ba don hapoh ka District Council bad ki Hima.
