Shillong, Naitung 07: U Executive Member (EM) ba khmih ia ka Tnad Development ka Khasi Hills Autonomous District Council (KHADC) Bah Martle N Mukhim ula pyntip b aka Executive Committee jong ka Council kala dep phah jingthoh sha ka Sorkar Jylla haba iadei bad ka jingshngain jong ka jingkieng Umiam.
Haba jubab ia ka jingkylli bala wanrah da u MDC ka Mylliem Bah Ronnie V Lyngdoh halor ka bynta jong ka District Council haba phai sha ka jingskhem jong ka jingkieng Umiam, u Bah Martle ula ong ba watla kane ka kam ka hap hapoh ka jingkhmih jong ka sorkar Jylla hynrei ka Council kala leh iala ka jong ka bynta da kaba thoh sha ka Sorkar ban thung ia ka kynhun ki riewshemphang (Expert) ki ban shong bishar ia ka jingskhem jong ka jingkieng.
“Ka District Council ka don ia ka hok ban tuklar haba iadei bad ka jingshngain jong kane ka Jingkieng bad namar kata, ka EC kala thoh sha ka Sorkar Jylla ban thung ia ka kynhun ki riewshemphang kiba ban shong bishar ia ka jingskhem jong kane ka jingkieng” ula ong.
Ha kawei pat ka liang, u MDC ka Pynthorumkhrah Bah PN Syiem ula ban jur ia ka jingdonkam ban don noh da ka jingkieng ba thymmai halor ka pung umiam namar ka don ka jingsheptieng ba kane ka jingden ka lah ban twa, bad buh ia ka jingim ki paidbah kiba sah sharum jong ka Wah hapdeng ka jingma.
