Dawa ka UDP ia ka BJP ban pynshitom ia u Bah Sanbor ba pynjah burom ia u Lamphang

Date:

Share post:

Shillong, Naitung 07: Ka United Democratic Party (UDP) kala dawa ia ka Bharatiya Janata Party (BJP) ba kan leh eiei pyrshah ia u Nongialam ka BJP bad Myntri Sorkar Bah Sanbor Shullai halor ka jingkynnoh “bym khein snep bad bym niew kor” ia u President bad Lamphang ka Iingdorbar Bah Metbah Lyngdoh ha ka jingialang bad ka Kyrtong iakhun Elekshon President ka NDA ka Draupadi Murmu ba long hynnin ka sngi ha Orchid Lake Resort, Umiam.

Ka UDP kala lum ia ka jingialang ba kyrkieh hynne ka sngi palei bad kala pynrem jur ia kane ka jingleh jong une u Myntri Sorkar uba la ieng ban pyrshah ia ka jingkren u Lamphang ha ka por ba u dang pynpaw ia ka jingsngewkhia ia ka jingshah thombor ki paid riewlum ka Ri hakhmat kane ka kyrtong President ka Ri.

“Ngi kyntu ia ka BJP, kaba khot ia baroh ki seng sain pyrthei sha kane ka jingialang (hynnin ka sngi), ba kan ai jingsneng kum ka jingpynshitom pyrshah ia une u MLA jong ka. Ngi kyntu ruh ia u Nongialam ka Meghalaya Democratic Alliance Conrad Kongkal Sangma ban ai jingsneng kaba iahap pyrshah ia u Bah Sanbor” ong u Dr Jemino Mawthoh, General Secretary ka UDP.

U Dr Jemino u pyntip ba u President ka UDP bad Lamphang ka Iingdorbar Thaw Ain Bah Metbah Lyngdoh ula leit sha katei ka jingialang bala pynlong da ka BJP Presidential Election Committee. Kane ka jingialang ka dei kaba la khot na ka bynta ban pan ia ka jingkyrshan na ki seng sain pyrthei ka Jylla ba kin ai jingkyrshan ia ka kyrtong ka BJP ha kane ka elekshon President ka Ri.

U Dr Jemino ula ong ba u Bah Metbah ula kren ia kiba bun ki ishu ba kynthup ia ka jingshah thombor ki ritpaid bad ki riewlum, ka jingpynrung ia ka Ktien Khasi bad Garo ha ka khyrnit ba phra, ka Inner Line Permit (ILP) bad kiwei kiwei.

“Hynrei katba u (Metbah) dang kren ia kine ki kam, kynsan kynsan hapdeng jong ka jingkren, u Myntri Sorkar Ban Sanbor Shyllai ula pynthut bad namar kane ka dei ka jingialang kaba kongsan, ngi sngew ba kane ka jingpynthut ka dei ka bym iahap, ka bym dei rukom ha kum kane ka jingialang ba kongsan ha ka jingiadonlang ka kyrtong President bad ruh hakhmat u Myntri ka Sorkar India bad ki Nongialam na ki party bapher bapher” ula ong.

Haba kylli, u Dr Jemino ula ong ba ka Party kan sa peit ba kumno kane ka kam ka iaid bad kan sa shim ia ka rai ia kaei pat ka sienjam ba ka dei ban shim.

“Ngi khlem pat iakren shaphang kata hynrei lada ka donkam ba ngin leh eiei, ngin sa peit shuwa namar kane ka dei ka jingleh jong uwei u briew uba dei na ka BJP. Ngim ong eiei shaphang ka party hynrei ngi kwah b aka Party kan leh eiei shuwa nyngkong bad ngin sa peit kumno ngin jam shakhmat” ula ong.

Une u Nongialam ka UDP ula ong ruh ba ka Party ka khlem iakren eiei shaphang ka jingpan map hynrei kala rai ban ieh ha ka jingstad jong ka BJP bad u Nongialam ka Sorkar MDA haba bynrap ba shen kan sa phah ruh da ka shithi halor kane ka kam.

Haba kylli hato ka jingdawa kan dei halor ka jingweng noh ia u Bah Sanbor na ka shuki Myntri, u Dr Jemino ula ong b aka UDP kala shu kyntu ia u Myntri Rangbah lyngba ki lad pathai khubor ba un leh eiei kum ka jingai jingsneng pyrshah ia u Bah Sanbor.

Share post:

spot_img
spot_img

Popular

More like this
Related

Lashem taiew lah ban khot ka Sorkar ia ka HPC ban pynbeit ia ka kam Them Metor

Shillong, Nailur 29 : Ka Sorkar Jylla ka lah...

Assam: Shah kem 3 ngut bad u droks ba 1.15 kilo na Cachar

Guwahati, Nailur 29 : Ha ka jingiakhun pyrshah ia...

Pynrem ka VPP ia ka rai ka Sorkar India ban pynkhuid shnong ha ka Sngi U Blei

Shillong, Nailur 29 : Ka Voice of the People...