Shillong, Naitung 07: Ka Khasi Hills Autonomous District Council (KHADC) ka dang ap mynta ia ka rai jong ki san tylli ki Hima haba iadei bad ka jingujor mukotduma ia pyrshah ia ka Memorandum of Understanding (MoU) bala iasoi hapdeng ka Meghalaya bad Assam ban pynbeit noh ia ki jingiakajia pud ha ki hynriew tylli ki jaka khappud.
U Executive Member ba khmih ia ka Elaka Bah Jambor War ula pyntip ba u Chief Executive Member (CEM) ula khot ia ka jingialang ha ka 15 tarik Lber bad ki Khlieh Nongsynshar jong ki san Hima- ka Hima Mylliem, Hima Nongspung, Hima Jirang, Hima Nonglang bad Hima Jyrngam Sirdarship, kan pan ia ki jingai jingmut jong ki halor ka MoU.
Une u EM ula pyntip b aka KHADC kala dep phah jingthoh ruh sha u Myntri Rangbah ka Jylla Conrad Kongkal Sangma, kaba pynpaw ia ki jingai jingmut jong ki san tylli ki Hima haba kyrpad ruh ia ka Sorkar Jylla ban shong bishar thymmai biang ia kane ka soskulat.
“Hynrei, ngi khlem pat ioh jubab haduh mynta pynban ngi la shu iohi ha ki lad pathai khubor baka Sorkar Jylla kala ieng skhem ha ka nongrim ban nym khyllie shuh ia ka MoU” ong u Bah Jambor haba jubab ia ka resolution bala wanrah da u MDC ka Congress na Nongstoin Bah Gabriel Wahlang.
U Bah Jambor u pyntip ba hadien kane, kala don biang sa arsien ka jingialang bad ki san hima kaba la long ha ka 18 tarik Iaiong bad 22 tarik Iaiong. U ong ba ki Hima kila pynpaw ia ka jingdonkam ban thaw ia ka Coordination Committee jong ki MDC ka Liang Synshar bad Liang Pyrshah bad ki Khlieh Nongsynshar bad naba ka Sorkar kam kwah shuh ban shong bishar biang ia ka MoU, ka lynti kaba don ka dei satang ka jingujor da ka mukotduma sha ka Iingkashari.
“Ngi la thaw ia ka Coordination Committee ban peit ia ki jingeh bala iatyngkhuh da ki Hima. Hynrei haduh mynta ngi dang ap ia ka jingaiktien na ki Hima ia kaei kaba kila leh halor kane ka kam” ong u Bah Jambor haba pyntip b aka Committee kan sa khot shen ia ka jingialang.
Haba pynpaw ba ka don tang kawei ka jingduna na ka liang jong ka Sorkar Jylla, une u MDC ula ong ba hashuwa ban shim ia ka rai kaba khatduh ban soi ia ka Mou, ka Sorkar Jylla kala klet ia ki briew kiba iadon bynta ha kane ka kam kiba kynthup ia ki Khlieh Nongsynshar, ki Trai Shnong bad ki District Council, kaba dei ka nongsumar ia ka khyndew ka shyiap.
“Dei namar kane, ka District Council kaba dei ka nongsumar, ka hap ban tuklar ia kane ka kam ba iadei bad ka jingsoi ia ka MoU watla kane ka kam ka dei ka kam jong ka Sorkar Jylla” ula ong.
Une u Executive Member ula ong ba kam shym la don satia kano kano ka jingbym iasngewthuh jingmut hapdeng ki MDC halor ka kam iapynbeit pud. “Ngi la iatylli kawei haba iadei bad kane ka kam namar baroh arliang-ka Liang Synshar bad Liang Pyrshah ki dei kiba iadonlang ha ka Coordination Committee” ula ong.
Haba kyrshan ia kane ka Resolution, u MDC ka Congress na Mawhati Bah Charles Marngar ula buh jingkylli halor ka rai jong ki 11 ngut ki MDC ka NPP kiba kyrshan ia ka MoU. Ula dawa ruh ia ka jingpynshai halor ka sienjam bala shim da ka Coordination Committee bad ka nongrim ba ieng da ka Executive Committee jong ka UDP.
“Hato ngi dang don ka jingiatylli kawei halor kane ka kam khnang ba ki paidbah kin tip?. Lada ka Council kam lah ban leh eiei halor ka MoU bala iasoi khlem ka jingtip lang jong ki briew ba iadonbynta ha ki kam pud kam sam, nga sheptieng ba ka kylla kaba ar jong ka jingiakren pynbeit pud kan nang ktah shuh shuh ia ki paidbah kiba hap hapoh u pud u sam jong ka Council” ong u Bah Charles.
Une u MDC ula kyntu ruh ia ki 11 ngut ki MDC ka NPP ba kin pyrkhat biang ia ka rai ban kyrshan ia ka MoU lada ka iaid pyrshah ia ka bha ka miat jong ki trai riewlum ka Jylla.
Haba pyrshah ia kane ka Resolution, u MDC ka NPP na Rambrai-Jyrngam Bah Bajop Pyngrope ula ong ula ong ba undang iai bteng ban kyrshan ia ka MoU ban pynthikna ia ka jingpynbeit noh shisyndon ia ka jingiakajia pud, kaba la iaid da ki phew phew snem hapdeng ka Jylla bad ka Assam.
“Nga sngewthuh ba lada ngi nang pynslem ban pynbeit ia kane ka jingiakajia pud, ka jingeh kan iai bteng bad mano ruh ki bym kwah ban pynbeit noh ia kane ka jingiakajia kaba la wanrah ia ki jingkulmar ba bun jait bun rukom” ula ong haba bynrap ba dei tang ka Sorkar MDA kaba nud ban shim ia ka rai ha kaban pynbeit noh ia ka.
Une u MDC ula kam ruh ba baroh ki Shnong kiba hap hapoh ka Constituency jong u, kin dang iai neh bad ka Meghalaya namar ka MoU. Ula bynrap b aka MoU kala kren shai b aba hok longtrai ia ka khyndew ka shyiap kan iai neh bad ki paidbah.
Ha kajuh ka por, u MDC ba shu sieh Bah Bindo M Lanong ula ong ba ka Sorkar Jylla kam lah ban shu shim rai muk mak tang ban ioh kam ba ka la lah ban pynbeit ia ka jingiakajia pud ha ka jingsynshar jong ka. U ong ba ka Sorkar Jylla ka dei ban pynneh pynsah beit ia u pud u sam kumba u long.
