Shillong, Risaw 23: Haba pynkut ia ki jingiakren halor ka kam bujli Myntri, u Symbud Myntri Rangbah bad President ka NPP Meghalaya Bah Prestone Tynsong u la ong ba kam shym la don kano kano ka jingpynbeit lypa bad ki 3 ngut ki MLA barim ka UDP kiba dang shu pyniasoh bad ka NPP bad ba ka kynhun Myntri ba mynta ka la don lypa ia ki kam ba la bynshet lypa.
Haba kylli lada kan don ka jingpynrung Myntri ia uwei na ki 3 ngut ki MLA barim jong ka UDP, u Bah Prestone ula ong “Ha ka kynhun Myntri ka la dap mynta, ki don ia ka kamram bala bynshet jong ki.”
Halor ki khubor ba u Bah Paul Lyngdoh un shah kynthup biang haka kynhun Myntri, u Bah Prestone ula ong “Kum kata, ngam tip. Nga kwah ban tip na phi ban iathuh ia nga. Nga dei u Symbud Myntri Rangbah hynrei ngam tip ei ei shaphang kata. Nga tip tang na phi, kumta phi lah ban iathuh mano ba iathuh ia phi kumta. Nga ruh nga kwah tip na phi.”
U Bah Prestone ula kyntait ruh ba don ka jingpynbor na ka BJP ban ai bhah shuh shuh haka kynhun Myntri Sorkar hadien ba 8 ngut ki MLA ka UDP ki la pyniasoh bad ka party.
“Kam don kum kata ka jingpynbor, ym don kaei kaei kaba kum kata,” u la ong.
Haba kylli don ne em ki jingkular ia ki 3 ngut ki MLA ka UDP ba wan iasoh bad ka NPP, u Bah Prestone u la pynshai, “Haba iadei bad ki MLA ba thymmai jong ngi kiba wan na ka
UDP kam shym la don kano kano ka jingkular”.
U Bah Prestone u la ong ba u dang iakynduh ia ki nongialam party ban pynkhreh na ka bynta ka ilekshon MP shiteng samoi.
“Nga kwah kum u state president jong ka NPP ban iakynduh ia baroh ki nongialam ym tang na ka district hynrei wat ha ka kyrdan jong ki constituency bad ki shnong. Mynta ka sngi nga la pynlut por shibun kynta ban iakynduh ia ki bad ban iakren bad ki shaphang ka jingpynkhreh kaba ngi la leh bad kumno ban long kiba la pynkhreh ban iakhun haka ilekshon MP shiteng samoi” u la ong.
