Tura, Naitung 07: Ka West Garo Hills District kan sa ioh haduh 40,000 tylli ki smart meter ban pyndait ha ki Longiing jong ka District ha ka kylla ba nyngkong bad kan nym don satia kano kano ka jingsiew ha ka jingpyndait ia kine ki meter na ka bynta 5 snem.
Ia kane la pyntip da ki Heh Ophisar kiba leit ban ai jinghikai halor ka jingpyndait bad jingpyndonkam ia ki smart meter, kaba la pynlong da ka MePDCL ha ryngkat ka jingiatrelang bad ki bor District ka West Garo Hills hynne ka sngi balang ha DRDA Hall, Tura.
Ha kane ka jingialang, ki Heh Ophisar ka MePDCL kila pyntip ba ka jingpyndait ia ki smart meter ha kiwei kiwei ki District jong ka Ri-lum Garo kala iaid shaid shaid mynta bad ia kane yn sa leh ruh ha West Garo Hills ha kaba la khmih lynti ban pyndep noh ia ka kam hashuwa u bnai Naiwieng lane Nohrpah mynta u snem.
Ha kane ka prokram ki Heh ka Kompani SGIL kila pyntip ba ki smart meteer ki dei kiba wan ha ryngkat ka GPRS bala pyndait lang shapoh bad lah ruh ban siew ia ka bai bording lyngba ki kor internet ne ka online payment.
Kine ki Heh ka Kompani ki pyntip ba haduh mynta ka sngi, ka kompani kala dep ban pyndap haduh 44,000 tylli ki smart meter ha kylleng ki jaka jong ka Jylla.
