Shillong, Naitung 07: Ka Iingkashari u Special Judge (POCSO) kala hukum ban set along haduh 10 snem ia uwei u briew uba donkti ha ki kam lehbeijot ia iwei I Khynnah ha u snem 2014.
Ka Iingkashari kala pynmih ia kane ka hukum ha ka 4 tarik Naitung haba bishar ia ka case bala register hapoh ka Tura Women Police Station kat kum ka kyndon 376(2) (i) IPC pule bad ka kyndon 5 (m)/6 jong ka POCSO Act, 2012.
Ki Pulit ka Tura Women Police Station kila ioh pdiang ia ka jingujor ha ka 8 tariki Naiwing 2014 ba uwei u briew ba kyrteng u Victor Ch Marak ba ju khot sin u Tengchu, ula leh beijot ia iwei I Khynnah rit hala ka jong ka Iingsah. Ka Heh Pulit Inspector Gorethy T Sangma kala shimti ban khlieh ia ka jingtohkit kum ka Investigation Officer.
Kane ka Heh Pulit kala aiti ia ka chargesheet ha ka 1 tarik Nailar 2017 bad ka Iingkashari Special Judge (POCSO) ka West Garo Hills, kala shem ba une u briew ula donkti ban leh ia kane ka kam bymman bad la pynngat ia u hapoh ka jingpynsajia kat kum ka kyndon 376(2) IPC pule lang bad ka kyndon 6 of POCSO Act, 2012.
Hadien kane, ka Iingkashari ha ka 4 tarik Naitung kala pynbna ia ka hukum ban set along ia une u nongleh beijot da 10 snem lem bad ka kun aba T.40000 lem kumta un hap ban bteng ia ka jingshong along sa 6 snem lada um lah ban siew ia ka kuna.
