Palat 700 mm la ioh tam ia u slap ha Jylla, yn dang ioh bun ha ki bnai ban wan
Shillong, Jylliew 18: Ka Jylla Meghalaya ka la ioh tam lypa ia palat 700 millimetre u slap tang ha kine ki hynriew bnai ba la leit noh bad la khmih lynti ba ka jingwan u slap kan dang iai bteng ha kine ki bnai ban wan khamtam ba ka aiom lyiur ka dang shu sdang.
Kane ka jingwan jong u slap ba khlem sangeh ka la wanrah ia shibun ki jingjulor ha kylleng ki jaka bad shim ruh ia shibun ki mynsiem briew kynthup ha Ri-lum Khasi bad Garo.
Ha u snem 2021, ka Jylla Meghalaya ka la ioh haduh 2968.4 mm u slap ba kynthup ha baroh ki bnai lyiur kaba sdang naduh u bnai Jylliew haduh u Nailur. Ka jingioh slap ka Jylla ha ka shisnem ka kot 3748.2 mm.
Kaba pynkhuslai ka long ba ka Jylla ka la kynjoh lypa mynta ia ka 2261.9 mm u slap tang haduh kane ka taiew ba-ar jong u Jylliew katba ka lyiur ka dang sdang ban khyrwit.
Ki jaka ba ju ioh bun eh u slap bad ba jur eh kata ka Sohra bad Mawsynram kila dep kynjoh mynta ia ka jingioh slap ba kot sha ka 4000 mm, kaba long arshah ia kaba mynshem snem ha une u juh hi u bnai.
Kiwei ki jaka kum ka Trikikilla bad Ampati ha Ri-lum Garo, ki bym ju kham ioh ia u slap ba neh bun sngi, kila kynjoh ia ka tripple digit ne jab kot hajar millimetre u slap.
Ka Sohra kaba dei shisien ka por kum ka jaka ba jur slap tam ha ka pyrthei shuwa ban shah knieh ha ka Mawsynram, lah iohi ba ka la nang kiew ha ka jingioh slap.
Ka Mawsynram kala kynjoh 4216.3 mm tang ha kine ki artaiew shiteng jong u bnai Jylliew mynta u snem katba ka jingioh slap ha une u juh u bnai jong u snem ba la leit noh ka la kynjoh tang 2647.2 mm.
Wat ka Sohra ka la ioh palat 1500 mm tam u slap ha une u bnai ba mynta. Ha u snem ba la lah jong u bnai Jylliew, ka Sohra ka la ioh 2547 mm katba mynta u snem ka la kynjoh sha ka 4081.3 mm tang ha kane ka shiteng bnai.
Ka Khliehriat ha East Jaintia Hills District ka ba ioh slap tang 899 mm ha u bnai Jylliew jong u snem 2021, mynta kala kynjoh ia ka 1699.2 mm tang haduh ka 17 Tarik Jylliew.
Ka Nongbah Shillong ka la ioh haduh 516.2 mm u slap haduh mynta u bnai Jylliew. Ha u snem ba la lah, ka la ioh tang 229.8 mm u slap ha u bnai Jylliew.
Kawei pat ka jaka ba ioh bun eh u slap ka dei ka thain Shella ha East Khasi Hills, ka ba la kiew ha ka jingioh slap na ka 710.3 mm ha u bnai Jylliew 2021 sha ka 2114.4 mm mynta.
Ka thain Jowai ka la ioh 800 mm tam u slap. Ha u snem ba la leit, kane ka thain ka ioh tang 605 mm ha u bnai Jylliew hynrei mynta ka la kynjoh ia ka 1501 mm.
Wat ka Tura ha Garo Hills ka la ioh tam ia u slap sha ka 100 mm mynta u bnai bad ka jingkhein kan nang iaid. Ha u bnai Jylliew jong u snem ba la leit, ka Tura ka ioh 457.4 mm u slap hynrei mynta ka la kor sha ka 561 mm.
Katto katne ki jaka kum ka Trikikilla bad Ampati ha Garo Hills, kham niar ba kin ioh ia u slap ba jur bad ba neh bun sngi, ki la hap ban buh jingkhein thymmai ia ka jingioh slap mynta.
Ka Trikikilla ka la ioh 500 mm tam u slap mynta u bnai. Ha u bnai Jylliew 2021, kane ka jaka ka la ioh tang 289.4 mm hynrei ha kane ka kynti ba mynta ka la tam ia ka 785 mm.
