Shillong, Jylliew 17: U Lamphang ka Ïing Dorbar Thawaiñ ka Jylla Meghalaya, u Bah Metbah Lyngdoh u la pynpaw ia ka jingbynñiaw pyrshah ïa ki bor pynïaid ka North Eastern Hill University (NEHU) halor ka jingbym lah jong ki ban pyntreikam ïa ki skhim bapher bapher bad kumjuh ban teh lakam ïa ki jingeh kiba ki khynnah pule ki ïakynduh ha kane ka skul bah.
Ïa kane ka jingkynthoh, u Lamphang u la pynpaw haba kren kum u kongsan ha ka General Welfare Meet 2022 kaba la pynïaid da ka North East Hills University Students Union (NEHUSU) kaba long ha kane ka sngi Palei.
Da kaba kyntu ia u Vice Chancellor ka University, u Prof. Prabha Shankar Shukla uba donlang ha katei ka jingialang, u Lamphang u la kyntu ia u ban ïa soi ia ka jingiateh kular ban ai ki lad pule bad ki jinghikai ei kiba biang ïa ki samla pule kiba dei ki jaidbynriew riewlum na ka bynta ki eksam Civil Services ba pynlong da ka Union Public Service Commission (UPSC). Nalor kane u la ban jur ia ki bor pyniaid ban shim khia ïa ki mat jingeh ki khynnah pule ha kaba ia dei bad ki jaka sah.
“Ngam banse ban kren ïa kane namar bun ki khynnah pule ki la wan ban pynsngew sha nga bad pynpaw jingeh halor bun tylli ki mat kum ka skhim na ka bynta ka eksam NEET kaba ym pat pyntreikam satia, ka jingpynslem ban pyntreikam ïa ka bynta ba ar jong ki Technology School bad kiwei kiwei pat “, u la ong.
Halor ka jingdonkam ka pule puthi kaba paka, u la ong ba dei ban shim kongsan ia ka namar ka pule puthi kan wanrah jingkylla ha ka rukom im. “Ngi donkam ban ïakren halor ka pule puthi kaba biang paka namar ka University kam shym la wan sha khmat ha ki snem kiba la dep na ki eksam bapher bapher”, u la ong.
Da kaba ai khublei ïa ki samla pule kiba la pyndep ïa ki kyrdan jingpule, u la ong, “Ka kyrdan pule kaba phi ïoh ka long kum ka insurance policy ryngkat ka premium kaba la siew lut da ka jingtrei shitom ha baroh kine ki snem. Ka dor jong kane ka policy ka shong kumno phi pyndonkam ha ka pule bad kaei kaba phi leh ka ïaid lang bad phi”.
