Shillong, Jymmang 22: Ka Synjuk ki Nongsynshar Shnong ka Bri Hynniewtrep hynne ka sngi kala thaw daka Core Committee ban iathir bad ka sorkar jylla halor ka rukom pyntreikam iaka Roster System bad halor ka jinglong jingman ka bhah thungkam lane ka Reservation Policy.
Ia kane ka rai la shim haka jingialang jong Ka Synjuk ki Nongsynshar Shnong ka Bri Hynniewtrep bala pynlong ha Mission Dorbar Hall ban iathir halor ka rukom pyntreikam iaka Roster System bad iaka bhah thungkam lane ka Reservation Policy.
Haba kren sha ki lad pathai khubor u Secretary ka Ka Synjuk ki Nongsynshar Shnong ka Bri Hynniewtrep u bah R.L Blah ula iathuh ba kumba 45-50 ngut ki Rangbah Shnong na kylleng ka sor bad khapsor kila wan shim bynta ha kane ka jingialang ban iakren halor ka rukom pyntreikam iaka Roster System bad halor ka jinglong jingman ka Reservation Policy.
“Haka jingialang la shim iaka rai ban thaw daka Core Committee haka jingialam u bah R.L Blah kum u Chairman bad ha kane ka Committee ki don 10 ngut ki dkhot nalor u Chairman bad ka kamram jong kane ka Committee kadei ban bishar bad ban khmih bniah iaka Roster System bad haka juh ka por ban iakren bad ka sorkar jylla halor ka Reservation Policy” la ong u bah Blah.
U bah Blah ula iathuh ba ia kane ka Core Committee la thaw namar ba ka sorkar jylla ka lah ban lum iaki Rangbah Shnong haka 26 tarik mynta u bnai ban iathir halor ka rukom pyntreikam iaka Roster System.
