New Delhi, Jymmang 22 : Ka National People’s Party (NPP) kala rai ban iakren bad baroh ki jaidbynriew ba kin iatreilang ha kaban lah wanrah pat ka jingshongsuk shongshngain ha Jylla Manipur, kaba don hapdeng ka jingshongsyier hadien ka jingiakynad pher jaidbynriew dang shen.
Haba iakren bad ki nongthoh khubor hadien ba pyniaid ia ka jingialang jong ka National Committee jong ka NPP ba long ha Constitution Club of India, New Delhi hynne ka sngi Nyngkong, u National President bad Myntri Rangbah ka Jylla Conrad K Sangma ula ong “Ka NPP ka pang mynsiem halor ka jinglong jingman ha Jylla Manipur. Kum ka party, ngi rai ban iakren bad baroh ki jaidbynriew ba kin iatreilang ha ka ban lah wanrah pat ia ka jingshongsuk shongshngain. Ngi duwai ka jingjai jai kan wan phai noh kham kloi, kaban long na ka bynta ka Jylla bad ki nongshongshnong”.
Ula ong ba ka party kala rai ban leh kat kaba lah ha kaban lah wanrah pat ia ka jingsuk ha Manipur.
“Ngi la shim rai ba kum ka seng sain pyrthei, ban leh kat kaba lah na ka liang jong ngi ha kaban iarap bad pynthikna ba ka jingsuk kan wan phai biang bad ruh ban iarap ia ki briew ha baroh ki jingeh ba ki iakynduh. Ki Nongialam bad ki nongtrei ka party kila iatrei khlem shongthait ban pynthikna ban gin lah ban iarap bad kyrshan ia ki briew na Manipur ha kane ka khep ba jynjar” ula ong.
Ha kane ka jingialang jong ka National Committee ka NPP la wan ban iashimbynta da ki nongkitkam ba Jylla Assam, Arunachal Pradesh, Manipur, Mizoram, Chhattisgarh, Jharkhand, Karnataka, Gujarat bad Uttar Pradesh.
Ha kane ka jingialang, ki Nongialam na ki Jylla bapher bapher kila ai aikaiphod halor ka jingpynkhreh jong ki ia ka elekshon MP Lok Sabha ban wan bad kumjuh ruh ia ka elekshon MLA ka ban sa long ha Mizoram. Nalor kane, la pynkup burom ruh ia ki MLA ba thymmai ka Meghalaya, Nagaland bad Manipur.
U National Treasurer James K Sangma ula ai kaiphod halor ka mang tyngka ka party ba shisien shisnem jong u 2023-2023, kaba long kat kum ka Article 23 (V) jong ka riti treikam ka party. Ula ai kaiphid ruh halor ka audited statement jong ka pla tyngka ba shisien shisnem. Kumjuh ruh ki President jong ki Jylla bapher bapher kila ai ia ka kaiphod treikam hala ki jong ki Jylla.
Lah ban kdew hangne, ka NPP ka dei kawei na ki 6 tylli ki National Party hapoh ka Jylla, bad tang ma ka kaba dei kaba mih na ka Thain Shatei Lam Mihngi ka Ri.
Ha kajuh ka por, u Conrad ula pynbna ruh ia ka jingpynkiew kyrdan ia u National Treasurer James K Sangma kum u National General Secretary (Organisation) ba khmih ia ka Jylla Arunchal Pradesh. Namar ka elekshon ban wan ha Mizoram, ka NPP kala thung ia ka Myntri Sorkar Kong Ampareen Lyngdoh kum ka Nongialam ba khmih ia ka Mizoram.
U MLA na Manipur M Rameshwar Singh bad MLA na Meghalaya Ian Botham K Sangma lem bad u Nongialam ka Party Sushil Huidrom kila shah thung kum ki co-incharge ka Jylla Arunachal Pradesh bad Mizoram ban khmih ia ki kam ka party ha kine ki Jylla n aka bynta ka elekshon MP Lok Sabha bad elekshon MLA.
Ia u MLA ka Nagaland N Nyamnyei Konyak la thung kum u President ka NPP ha Nagaland katba ia u President Dr Andrew Ahoto la kyntiew kyrdan kum u National General Secretary.
