New Delhi, Naitung 21: Ka kyrtong jong ka NDA ka Draupadi Murmu kala thaw histori ban long ka Jaidbynriew Riewlum ba nyngkong eh jong ka Ri ka ban shimti ia ka shuki President jong ka Ri.
Ka Murmu ba 64 snem ka rta, ka dei ka Jaidbynriew Adivasi bad ka Kynthei ba-ar ban shimti kum ka Nongshongshnong ba nyngkongeh (first citizen) bad ka Supreme Commander jong ki Shipai ka Ri India hadien jong ka Pratibha Patel.
Ka Murmu kala jop pyrshah ia u kyrtong ka Liang Pyrshah u Yashwant Sinha hadien ka jingioh haduh 64 % ka vote haka jingniew ia ki vote ki MP bad MLA kaba la neh palat 10 kynta, ban shimti ia ka kam President na u Ram Nath Kovind.
U Returning Officer PC Mody ula pynbna ia ka Murmu kum ka nongjop da ka jingioh haduh 6,76,803 vote pyrshah ia u Sinha uba ioh 3,80,177 vote ban long ka President ba 15 jong ka ri.
Ka Murmu ka dei kaba la shah jied kum ka MLA haduh arsamoi sha ka Iingdorbar Thaw Ain ka Odisha ha u snem 2000 bad 2004 bad kala shakri kum ka Myntri Sorkar ha kine ki snem hapoh ka sorkar jong ka BJD-BJP ba ialam da u Naveen Patniak. Kala bam smai kum ka Lat jong ka Jharkhand ha u snem 2015.
