“Na ka jyrsieh thungkam Nonghikai u snem 2009”
Shillong, Naitung 22: Ka Sorkar Jylla kala pynmih ia ka hukum ban khang thungkam ia palat 157 ngut ki briew ha kino kino ki Tnad Sorkar namar ki dei kiba la pynbna thohbria ha ka jyrsieh thungkam nonghikai jong u snem 2009.
Ia kane ka hukum la pynmih da u Commissioner & Secretary ka Tnad Education u BDR Tiwari myn ha ka 19 tarik Naitung.
“Haba pynbud ia ka hukum jong ka Tnad ba 22 tarik Rymphang 2022 bad kumba la thoh ha ka sla 103, para (2) jong ka hukum ka Iingkashari Meghalaya High Court ba 2 tarik Naiwieng 2017, ki 157 ngut ki briew kiba la pynbna thohbria da ka Committee ki lai ngut ki Dkhot, lyngba ka shithi ba 14 tarik Jymmang 2022, kin hap ioh ia ka jingpynsajia bad la khang shirta ia ki ban wad ia kano kano ka kam Sorkar” ong ka hukum.
Une u Heh Ophisar ula hukum ruh ba kine ki Nongthoh tah sia lieh, kin hap ruh ban siew ia ka kuna ba mar T. 50,000 bad ban thep ia kane ka pisa sha ka Disaster Management Fund hapoh ka 30 sngi.
Ha kajuh ka por, ka Committee ki lai ngut ki Dkhot kila pynbna ruh ia hynriew ngut ki nongwadkam na ki san tylli ki Sub Division ki bym shym la shah pynbna thohbria, la bthah ia ki Director of School Education & Literacy ba kin thung biang ia ki ha ki kam nonghikai kat kum ka jingibit jong ki.
Kane ka Committee kala shong bishar haduh 165 tylli ki jingkyrpad na ki nonghikai thohbria na ki san tylli ki Sub Division ka Jylla bad la pynbna ba hynriew ngut kim dei satia kiba thohbria katba arngut watla ki dei kiba la palat ia ka rta iohkam, la lap ba ki khlem leh thoh lane tah sia lieh.
Ka Sorkar lyngba ka Tnad Education kala shong bishar ia kine ki jingkyrpad bad rai ban nym pynngat satia ha ka jingpynsajia ia kine ki arngut ki Nonghikai kiba kyrteng Nital Suna bad Daburom Dkhar jong ka Jowai Sub Division.
