Sngewkhia ba pynsahteng ia ka jingpynbeit khappud
Nongstoin, Nailur 18 : Ka Federation of Khasi Jaintia & Garo People (FKJGP) Rimuliang Circle kala kynnoh ba ka jingpyni bor jong ki Pulit ka Assam ha Langpih ka dang iai bteng wat hapdeng ka jingiakren ban pynbeit noh ia u pud u sam hapdeng ki ar Jylla.
Kane ka Seng kala pynpaw ruh ia ka jingsngewkhia bad jingbitar halor ka jingpynsahteng ki Sorkar na ki ar Jylla-Meghalaya-Assam ban pynbeit noh kloi ia ka jingiakajia pud ha ki thain Langpih.
Haba kren sha ki lad pathai khubor hadien ka jingialang paidbah ha Langpih, u President ka FKJGP Rimuliang Circle Bah Serbilin Lyngdoh ula iathuh ba dang ha kine ki sngi bala deo, ki briew ka Assam ryngkat ki pyrton Pulit kila wan rung ha ka thain bad pynibor ia ki nongshongshnong.
Kat kum ka jingong jong u, kine ki briew na Assam kila wan ban kem ia ki nongtrei bylla kiba pyntrei ia ka Iing jong ka Anganwadi Centre ha Noapara, kaba la tei na ka skhim jong ka Sorkar Meghalaya.
U Bah Serbilin u iathuh ba shuwa kane, ki briew ka Assam kila wan ban pynsangeh ia ka jingtei jong ka Health Sub-Centre ha Kompaduli, pynthut ia ki SHG kiba rep sohtrun ha shnong Borkhuli hynne ka sngi Palei ka 17 tarik Nailur.
“Kine ki jingïaiwan pynthud ki briew na Assam ïa ki briew jong ka thaiñ, ka pyni ïa ka jingbym kheiñ snep jong ka Sorkar Assam ïa ka mon laitluid jong ki paidbah nongshong shnong”, u la ong.
Halor kine kiei kiei, ka FKJGP Ri Muliang ka dawa jur ba ka Sorkar Meghalaya ba ka dei ban ai jingïada ïa ki paidbah nongshong shnong ha ka thaiñ bad pyntikna ba kitei ki skhim pynroi ha Noapara, Kompaduli bad Borkhuli kim dei ban sangeh.
“Lada ka sorkar kam lah ban pynïaid shaphrang ïa kitei ki project, ka la dei ka por ba ngin hap mih pyrshah ban nym shah shuh ïa ka Assam ruh ba kan wan pyntrei ïa kino kino ki project hapoh ka thaiñ”, u la ong.
