Shillong, Nailur 18 : Ka Khasi Students Union (KSU) kala kynthoh pyrshah ia ka jingkam ki Pulit halor ka jingmynsaw u Addl Superintendent of Police (Traffic) ba tynrah ka kali arshaka katba dang talasi kali hynne ka step phyrngap bad buh jingkylli “Hato nang ban niah ar shaka tang ki dkhot ka KSU”?.
Ka KSU kala pynpaw ia ka jingbym sngewtynnad ia kaei kaba jia bad sngewkhia ruh ia kano kano ka jingjia kaba lah ban pynmynsaw ia ki briew kynthup ki briew ka ain. Hynrei ka pynpaw ia ka jinglyngngoh bad kyndit ba ka mih ka jingkynnoh khamtam ka jingpyniasnoh beit ia ki nongniah scooty bad ka KSU.
Ka kyrwoh na u Information and Publicity Secretary samla Pynshai Kupar M Dkhar ka ong “Ki Pulit ki suba ba kitei kiba niah scooty ki dei ki dkhot ka KSU….Ha kano ka nongrim ki pynshong nongrim ia kane ka jingkynnoh? Ki la ioh jingtip shisha ne tang ka jingmutdur? Ka Seng kan ym lah an pdiang da lei lei ruh ia kine ki jingkynnoh ba khlem shongnia”.
“Ka KSU ka pynrem jur ia ki jingkynoh ba khlem nongrim…Lada don ki briew kiba pynkhein ain, to kem ia ki, pyni ia ki sakhi, pyni ia ki dur CCTV ladadon, bad pynshisha ha ka Iingbishar. Ka Ain ka dei ban treikam halor ki sakhi, ym halor ka jingmutdur lane ka jingkynnoh” thalain une u nongialam ka KSU.
U samla Pynshai ula ong “Lada ki Pulit ki don ia ki sakhi kiba pyni shai ba kitei ki nongniah scooty ki dei ki dkhot ka KSU, to pyni ia ki sakhi bad shim ia ka lynti kat kum ka ain. Ka KSU kam kyrpad ia kano kano ka jingisynei lada don ki dkhot ka seng kiba leh bakla. Hynrei ka seng kan ym ailad ruh ban pynjot ia ka kyrteng jong ka tang da ki jingkynnoh ba khlem nongrim”.
Haba pynpaw ba ka KSU ka tip bha ia ka jingkitkhlieh jong ka kum ka seng, ula ong “ Ngi kyrshan ia ka aiñ bad ka jingshngaiñ ha surok, hynrei ngi pyrshah jur ia kano kano ka jingpyrshang ban pyndonkam ia ka jingjia kum kane ban pynjah burom lane ban pynsaphriang ia ki jingkynnoh pyrshah ia ka Seng khlem da don ki sakhi kiba shai”.
Ka KSU kala kyntu ia ki Pulit ba kin pynlong ia ka jingtohkit kaba khuid bad kaba pynshong nongrim tang ha ki sakhi.
