Shillong, Nailur 18 : Ka Sorkar Jylla kala iaid pynkhreh shaid shaid ia ki jingdonkam baroh na ka bynta ka jingpynlong ia ka tamasa Shillong Cherry Blossom, kaba la buh ban long ha u bnai Naiwieng.
Kum shibynta jong ka jingpynkhreh, ki bor district kila leit jurip ia ka jaka ban pynlong ia ka tamasa bad peit bniah ruh ia ka rukom pynkhreh bad ki jingtei kiba donkam ban pyntrei khnang ban pynthikna ba ka tamasa kan iaid beit iaid ryntih.
Ki bor district kila pynleit jingmut eh sha ka kam ban pynbeit ia ka iaid ka ieng ki kali, ka iaid ka ieng u paidbah bad kiwei ki jingdonkam ba kongsan na ka bynta ki nongwan tamasa.
U Deputy Commissioner ka East Khasi Hills Abhilash Baranwal, IAS, ula ong ba ka jingpynkhreh kala iaid mynta bad kibor district kin pynthikna ia ka jingpynbeit kaba khlain ha ka liang ka pahara khnang ban pynsuk ia ka leit ka wan bad ka jingshngain jong ki nongwan tamasa.
Ia ka tamasa Shillong Cherry Blossom la buh ban pynlong ha ka 20 bad 21 tarik Naiwieng ha New Shillong Highland Ground ha Mawkhanu, New Shillong bad yn pynshongshit ia ka da ki nongput nongtem bad nongrwai kiba pawnam ka pyrthei ha kine ki arsngi.
