Shillong, Rymphang 20 : Ia ka met ba sah jong u MP ka Shillong Dr Ricky AJ Syngkon lah rah noh na Pohkseh sha ka Iing sah jong u ha Nongsder, Ri-Bhoi District ha ka sngi Thohdieng, bad la synran ia ka da ki Nongialam ka VPP bad ki Nongkyrshan.
U President ka VPP Ardent Miller Basaiawmoit, u CEM ka KHADC Winston Tony Lyngdoh, ki MLA bad MDC ka party lem bad ki paidbah, kila synran ia ka synduk buh metiap sha Nongsder.
Shuwa ban rah ia ka met, lah pynlong ia ka jingiaseng duwai ha Pohkseh.
U Myntri Rangbah ka Jylla Conrad K Sangma ula leit sngewlem sha ka Iingsah ha Pohkseh bad ai khublei khatduh ia une u Nongialam paidbah ba khlad noh.
U Myntri Rangbah ula pynbna ia ka shuti ha baroh ki District kiba hap hapoh ka Shillong Parliamentary Constituency lah sngi Saitjain ban ailad ia ki paidbah ba kin leit ontep bad ai burom khatduh ia u MP.
U Dr Syngkon, uwei na ki nongseng ka Voice of the People Party (VPP), ula khlad noh ha Dr H Gordon Robert Hospital ha ka miet sngi Palei, tang khyndiat por ba u kyllon ha ka jingialehkai futsal ha Mawlai Mawiong. La pynbna ba ula khlad ha ka por 8:45 baje mynmiet.
Ia ka met ba sah jong une u nongialam ba khlad noh yn leit ontep ha ka sngi Saitjain.
