Shillong Rymphang 20: U Myntri ka Sorkar Jylla Bah Sanbor Shullai ula pynpaw ia ka jingsngewsih halor ka jingkhlad kyndit u MP ka Lok Sabha na Shillong Parliamentary Constituency Dr. Ricky A. J. Syngkon ha ka miet 19 tarik u Rymphang.
U Bah Sanbor ula ong, ba u Dr Ricky u long u briew uba la pawkhmat bha ha ki kam kiba iadei bad ka imlang sahlang, kum u nongialam ha ka sain pyrthei bad ha ka niam, u long ruh kum u Philosopher, nongbtin lynti bad u nongiada.
“U long uba donsap, uba hok bad shida bad uba kren beit ia ka jingshisha ha ka jinglong ka jongu bad uba tbit ruh ban ai jingkren uba dap da ka jingskhem jingmut bad ka jingshlur. Ngin iai kynmaw ia u halor ka jingnoh synniang ha ka jingai jingshakri bad ban kynmaw ruh ia ka jinglong ba kordor ha kaba iadei bad ki parabriew bad ka jingshaniah ha ka jingdon ia ki niam bapher bad ka jingiatreilang ha ka imlang sahlang. U long u nongkhmih ia kiba duk, kiba donkam bad ia ki kynhun kiba tlot” la pynpaw u Bah Sanbor.
Ula ong, ba u Blei ula tip bad iohi ia ka jingmad ka jongu bad kumta ula rai ban pynkut noh ia ka jingiam bad ia ka jingpang bad ula shim noh sha lade ia u (L) Dr. Ricky A. J. Syngkon.
“Ka pait ka dohnud ban duh noh ia phi, tangba phim shim la leit marwei namar shi bynta na ngi ruh kala leit lang bad phi ha ka sngi kaba u Blei ula khot noh ia phi sha ïing. Nga shimet, na ka liang ka ïing ka sem ka jong nga bad ki paitbah jong ka South Shillong Constituency, nga phah ia ka jingsngewlem sha ki bahaiing bahasem bad ia baroh kiba don ia ka jingiadei bad nga duwai ha u Blei Trai Kynrad ba un ialam, pyntngen bad ai bor ia ki ha kum kane ka khyllipmat kaba ki mad ia ka jingdum ha ka jingim ka jongki” la ong u Bah Sanbor.
