Shillong, Iaiong 01 : Ka ‘Eriong kaba wan ha ryngkat u lapbah kala syllad naphang ia ki shnong kiba hap hapoh ka Eastern West Khasi Hills hynnin ka miet sngi U Blei bad pynjulor ia palat 80 tylli ki Iing bad shim ia ka mynsiem jong uwei u Heprit hapoh ka thain.
Kat kum ka khubor ba ioh lum, ka iathuh ba ka eriong kaba jur bha kala wan lynshop ha ka por mynmiet bad bun bah ki Iing ki sem kila shah pynjulor ka tnum.
Kane ka eriong kala jynrat ruh ia ki dieng ki siej ha ki lum bad ki khlaw jong ka thain bad la sakhi ia kane da ka jingkhyllem jong ki dieng ha shilynter ka surok ka thain.
Ha Mawroh Laitdom, uwei u Khynnah ba 3 snem ka rta, ula duh noh iala ka mynsiem hadien ka jingshah bhen ha ka Iing kaba shah rah ha ka lyer. Une u heprit u kyrteng u Wiky Lawrynniang.
La iathuh ba ka eriong kala jynjat naduh tynrai ia ka Iingsah jong une u heprit bad kala rah ia ka Iing bad baroh ki briew ba don hapoh kynthup ia ka Kmie lem bad ki hynmen bad ki para. Kane ka lyer kala lynshop ia kane ka iing sha surok bad taplup ia baroh shi iing.
Ia une u heprit uba la mynsaw jur ha kane ka jingjia, la pynkit noh sha Laitdom PHC hynrei hadien ula khlad noh namar ka jingjur ka jingmynsaw.
Na ka liang ka Ophis u Block Development Officer (BDO) ka Mairang ula phah ia ki briew na Ophis, ban leit lum jingkhein ia ka jingpynjulor jong ka eriong hapoh ka thain baroh kawei.
