Shillong, Risaw 12 : Ka Kynhun ialehkai cricket ka Meghalaya kala shah pynliem da 83 runs ha ka kynhun ialehkai ka Haryana ha ka jingiakhun ba-ar jong ka Group C ka Syed Mushtaq Ali tropy T20 Tournament, kaba long hynne ka sngi Balang ha Punjab.
Hadien ka jingkawang bol bha, kaba tehlakam ia ka Haryana ban kamai tang 137 runs ha ka 20 over bad hap 7 wicket, ka Meghalaya kala shah pynhap lut ki wicket tang ha ka 53 run bad kane baroh ka dei ka jingioh shim haduh 3 wicket da u rang ialehkai barim ka India u Amit Misha uba kawang leg spin.
U Rajesh Bishnoi jong ka Meghalaya ula ioh ban shim haduh 4 wicket bad ai tang 12 run katba u Chengkam Sangma ula ioh shim shi wicket, u Raj Biswa shi wicket bad u Abhishet Yadav shi wicket.
Ka Meghalaya kam shym la lah ban beh thikna ia ka thong naduh kaba sdang bad da ka jingkawang bol u Amit Mishra, ula ba shim ia ki wicket kiba hapdeng, haduh lai ngut ki nongtied ka Meghalaya kila hap wicket khlem kamai run bad pynkut ia ka jingtied ka Meghalaya tang hapoh ka 14.3 over.
Ka Meghalaya mynta kan mih iakhun pyrshah sa ia ka Karnataka ha ka sngi palei.
