Shillong, Risaw 12: Ka seng HITO kala pynbna ba kan leit buh syntiew hakhmat khyrdop jong ka main Secretariat kum shi bynta ban pyrshah iaka jingkawang bomb pynsat khmat ki pulit iaki nonghikai haka 6 tarik mynta u bnai.
Haba kren bad ki lad pathai khubor u President ka HITO bah Donbok Dkhar ula ong ba kane ka jingleit buh syntiew kan dei haka 14 tarik bad ka seng kan iakynduh lang shwa ha u Mot Kiang Nangbah shuwa ban iaid shaduh khyrdop Secretariat.
U bah Donbok ula ong ruh ba ka jingleit buh syntiew kan dei ruh haka jaka sah u Myntri Rangbah ka jylla u Conrad K Sangma bad ha ophis treikam ka seng sain pyrthei United Democratic Party (UDP).
“Kane ka jingleit buh syntiew ka long kum shi bynta ban pyrshah iaka jingkawang bomb pynsat khmat ki Pulit iaki nonghikai haka por ba ba dang iakhih wat hapdeng ka jingdon lang ki longkmie ba armet bad ki khynnah” la ong u bah Donbok.
U bah Donbok ula ong ba lada ki pulit lane ka sorkar ka pynkloi ban siat bomb pynsat khmat iaki longkmie ne iaki khynnah, ka seng ruh ka kloi ban ieng naka bynta ban iada iaki bad iaki paidbah ka jylla baroh kawei.
