Shillong, July 17: Ka kynhun ialehkai jong ka Lawei Smit SC kala pynkut ia ka jingialehkai ha ka Shillong Sports Association’ Women’s League 2023 da ka jingjop ba 2-0 kol pyrshah ia ka Umpling SC ha ka Group A, kaba long ha madan Third Ground, Polo, hynne ka sngi Nyngkong.
Ha kajuh ka por, ha ka Group B, ka Maw U-Tieng bad ka Iasnohktilang Madanrting FC kila iakhaid mar shi kol ha ka jingiakhun ba khatduh jong ka group.
Ka Lawei Smit kala ioh ban thep ia ka kol ha ka minit ba 52 da ka samla Irilang Khongsit bad tang hadien san minit, kala ioh ban thep biang ia ka kol lyngba ka samla Fedelia Lamare.
Ka Lawei kala kit sha ka 7 point ha ka Group, watla ka lah ban duh ia ka kyrdan ba lai hadien ka jingiakhun lashai ka sngi. Ka Umpling kala kut ha ka kyrdan ba 5 da ka jingioh 3 point.
Shuwa kane, ha ka jingiakhun ha Iasnohktilang bad ka Maw U-Tieng, ia ka kol ba nyngkong la ioh ban thep nyngkong da ka Iasnohktilang ha ka minit ba 36 lyngba ka samla Jerina Mawlong bad tang hadien 6 minit la pynphai noh da ka samla Daphishisha Syngkli.
Ka Maw U-Tieng kala ioh bat ia ka kyrdan ba 7 ha ka Group katba ka Iasnohkti lang kala poi ha ka kyrdan ba 4, bad lah ban hiar sha ka kyrdan ba 5 lashai ka sngi.
Lashai ka sngi, ka jingiakhun ba khatduh jong ki Group ka long ha ka Group-A, ka Kick Start Football Coaching Centre kan iakhun pyrshah ia ka Mawkriah West SC, katba ka Kharang SC kan iakhun pyrshah ia ka Synroplang 77 ha ka Group B.
Pule ruh: Rakhe ka NEHU iaka jingdap 188 snem ka lyngkhuh sngi iap U Tirot Sing
